“რომ იბეჭდება, ნიჭიერი ქართველი ბაღანა ამერიკის უნივერსიტეტში სრული დაფინანსებით ჩაირიცხაო, ვინ იხდის იმათ სტიპენდიებს იცით?” – ზურაბ გურული

აშშ-ს მასაჩუსეტის უნივერსიტეტის პროფესორი, ზურაბ გურული:

“პარასკევ საღამოს ფიქრები…
——————————-

გრძელი მორიგეობიდან სახლში ვბრუნდები. მისისიპური მამაპაპური ბლუზია რადიოში. სიმღერასა და სიმღერას შორის ადგილობრივ ახალ ამბებს გადმოსცემენ.
– ტეხასში დასახლებულმა მისისიპელმა წყვილმა, ჯორჯ და ქეითი ბიშოფებმა მისისიპის სახელმწიფო უნივერსიტეტს ნიჭიერი ბავშვების სტიპენდიებისთვის 100 მილიონი დოლარი შესწირესო. ერთი კვირის წინ ჰარვარდს შესწირა 300 მილიონი კენ გრიფინმა, მილიარდერმა. გრიფინს ჰარვარდი ჰქონდა დამთავრებული, ბიშოფს მისისიპის სახელმწიფო უნივერსიტეტი. მასაჩუსეტსი ერთერთი უმდიდრესი შტატია, მისისიპი ყველაზე წყალწაღებული. სულისკვეთება ერთნაირია ორივეგან. მაგ სულისკვეთებას ჰქვია კლასი. კლასში ბევრი რამ შედის: განათლება, სოციალური ელეგანტურობა და რაც მთავარია, სულის საოხი პრინციპებიც. ჯორჯ ბიშოფი… გიორგი ეპისკოპოსი, უცებ ვთარგმნე ავტომატურად. მერე ქართველი ეპისკოპოსები გამახსენდა.. მართლმადიდებლები პრინციპში ამერიკელები არიან; მართალს და სიმართლეს ადიდებენ. მარტო საკუთარ ნიჭიერ ბავშვებს არ პატრონობენ ამერიკელები. ყოველდღე რომ იბეჭდება ქართულ პრესაში, ესა თუ ის ნიჭიერი ქართველი ბაღანა ამერიკის რომელიღაც პრესტიჟულ უნივერსიტეტში სრული დაფინანსებით ჩაირიცხაო, ვინ იხდის იმათ სტიპენდიებს იცით? ვინ და ჯორჯ ბიშოფის და კენ გრიფინის მსგავსი ხალხი. სამაგიეროდ რამეს თხოვენ ისინი ან უნივერსიტეტებს ან ხალხს, ან ქვეყანას, ან მსოფლიოს? არაფერს. მათი სახელებს დაარქმევენ რომელიმე კორპუსს თუ აუდიტორიას და ეგაა.
საქართველოში სამედიცინო ინსტიტუტების კურსდამთავრებულებს რეზიდენტურაში სასწავლებლად ფულს ახდევინებენ იქეთ; სახელმწიფოც და კერძო სექტორიც. უზარმაზარი კორპორაციები კადრულობენ ამას; ფულში რომ იხრჩობიან ისეთები. არადა, მედიცინა ისეთი ოხერი დარგია, მინიმუმ ორი დეკადა სჭირდება პროფესიონალად ჩამოყალიბებას. ეს კი ახალგაზრდის საუკეთესო წლებია; სიყვარული რომ უნდა, გართობა, ოჯახის შექმნაც და ამ დროს მათ შემოსავალი არათუ არა აქვთ, იქეთ ახდევინებენ ფულს წვრთვნაში და თან ვირებივით ამუშავებენ. ვინც ძალიან მაგარია, უკანმოუხედავად გარბის ამიტომ. ვინც ვერ უძლებს, ანებებს თავს სამუდამოდ. სამედიცინო ინსტიტუტის რამდენი კურსდამთავრებული იყო და არის საქართველოს პარლამენტში, რომელიმეს აზრად მოსვლია რეზიდენტურების სრული დაფინანსება და ხელფასთან გათანაბრებული სტიპენდიებისთვის რაიმე კანონმდებლობა რომ მოეფიქრებინა თუნდაც სულის საოხებლად? …
ჯორჯ ბიშოფი რომ ქართველი ყოფილიყო, ეკლესიას შეწირავდა საცხონებლად იმ 100 მილიონს, თუ უნივერსიტეტს? რამდენ ასეულ მილიონს მოპარავდა მანამ სამშობლოს?..
ღარიბია საქართველო; უნდა იყოს ღარიბი? ან მართლა ღარიბია? თუ უყაირათო და უგულოა?
უგულობაზე გამახსენდა. მთელი ქვეყნის თვალწინ ტირიან უბედური მშობლები თავიანთი შვილების გადასარჩენად. წამალი სჭირდებათ. არა აქვს ქვეყანას მაგის ფული ხომ? არც სახელმწიფოს, არც ბიზნესმენებს, არც ეპისკოპოსს. ეპისკოპოსი რა შუაში იყო … ჰო, ჯორჯ ბიშოფზე გამახსენდა.
მარტო გამართულ სახელმწიფო სტრუქტურებზე არ აშენებულა და არ დგას ამერიკა.
ამერიკა სწორად აღზრდილ ადამიანებზე დგას; სულიერად და სოციალურად სწორად განათლებულებზე. კლასი ჰქვია მაგას. ჩვენ?…
ჩვენ რად გვინდა კლასი, ილიკო ჩიგოგიძის არ იყოს, უკლასო საზოგადოებას ვაშენებთ.
… ახალი ამბების პაუზა დასრულდა რადიოში. ისევ აკვნესდა მამაპაპური მისისიპური ბლუზი…”