“მათ, ვინც ბლეფს უწოდებს ამ პანდემიას – მარტივად აგიხსნით…”

ამერიკაში მოღვაწე ქართველი ექიმი ზურაბ გურული სოციალურ ქსელში, წერს:

“მოვლენების და სიტუაციის კომპლექსურად აღქმის შეუძლებლობამ საკმაოდ ინტელექტუალური ადამიანებიც ჩერჩეტებად შეიძლება ზოგჯერ წარმოაჩინოს.
მაგალითად, გაუთავებელი კამათია კოვიდით გამოწვეულ სიკვდილიანობის პროცენტზე. ვინაიდან ჩამოყალიბებული და დასრულებული პლანეტარული მასშტაბის სტატისტიკა არ არსებობს, ამიტომ ამჟამად სიკვდილიანობის პროცენტული მაჩვენებელი საოცრად ცვალებადობს. ზოგან ძალიან მაღალია, ზოგან კი მკვეთრად დაბალი. ცხადია, საბოლოოდ ეს მაჩვენებელი განზავდება და საერთო მაჩვენებელი დიდი ალბათობით გაუტოლდება გრიპისა და სხვა რესპირატორული ვირუსებით გამოწვეულ სიკვდილიანობას, ან ძალიან ახლო იქნება მათთან.

ბოლოსდაბოლოს, ეს კორონაც კარგად ცნობილი რესპირატორული ვირუსების ოჯახიდანაა.
ახლა რაში გამოიხატება ე.წ. ცალფაზიან დამკვირვებელთა ფსიქოლოგიური მანიპულირება გაუთვითცნობიერებელ პუბლიკაზე, როდესაც ციფრების მანიპულირებით საკუთარი ნააზრევი აბსოლუტურ ჭეშმარიტებად გამოჰყავთ და პლანეტარული მასშტაბის ბლეფს უწოდებენ ამ პანდემიას; ცინიკური არგუმენტებიც არაერთი აქვთ; მაგალითად: შარშან გრიპმა უფრო მეტი მოკლა; ან ნახეთ ტუბერკულოზი რამდენს კლავს წლიურად და ასე შემდეგ.

მარტივ მაგალითს მოვიყვან ამ არგუმენტების ბოლის გასაფანტავად.
წარმოვიდგინოთ რომ რომელიღაც დიდ ქალაქში ყოველდღიურად ავარიაში კვდება 5-6 კაცი, წლიურად სადღაც დაახლოებით 2 200. დიდი ქალაქისათვის ეს ჩვეულებრივი სტატისტიკაა და არავინ შეიცხადებს, არც მორგებს და კლინიკებს დააწვება ეს მაინცდამაინც და რაც მთავარია, არც მოქალაქეთა კოლექტიურ ფსიქოლოგიურ განწყობას. ახლა წარმოიდგინეთ რომ იმავე ქალაქში ჩამოვარდეს უზარმაზარი ლაინერი და 300-400 ადამიანი დაიღუპოს ერთდროულად. მთელი ქალაქის სოციუმი ერთდროულად შეძრწუნდება და ფეხზე დადგება.
აი სწორედ ეს ხდება ამჟამად. უცნობი ვირუსი, გაურკვეველი ქცევებით, ძალიან შეკუმშულ დროის მონაკვეთში თავს დაესხა პლანეტას და იმ წარმოსახვითი ლაინერივით აფეთქდა, უამრავი ადამიანი შეიწირა. ფეხზე დადგა პლანეტა, დაიწყეს გამოძიება, მედია კონცენტრირებულად აშუქებს თითოეული ადამიანის ტრაგედიას; გამოჩნდნენ გმირები, შეიქმნა ათასობით ვერსია და ა.შ.
ამ დროს წარმოიდგინეთ რომ გამოტრაკუნდეს მავანი და განაცხადოს: – რა გაახურეთ ხალხო, 400 კაცი მოკვდა ბოლოსდაბოლოს, 2 200 კვდება ავარიით წელიწადშიო…
დანარჩენს თავად მიხვდებით, თავს აღარ შეგაწყენთ”