დედაქალაქის მერიამ 25 მარტს, 94,441 ლარის ღირებულების ფეიერვერკების შეძენის შესახებ გააფორმა ხელშეკრულება.
კომპანია “ქოლორფულ სფირითსთან” გაფორმებული კონტრაქტი ერთწლიანია და ის ძალაში 2021 წლის 28 თებერვლის ჩათვლით იქნება ძალაში.
BMG-ის კითხვაზე – თუ რა ღონისძიების გასაფორმებლად იყიდა მერიამ ფოიერვერკები, დედაქალაქის მთავრობის პრესსამსახურში გვითხრეს, რომ მისი შეძენა ზოგადად ყველა დღესასწაულისთვის მოხდა.
ჯამურად, დედაქალაქის მერია 2670 ცალ ფოიერვერკის ჭურვს ყიდულობს.
“ალია” – ქვეყანა და დედაქალაქი ყიდულობს, ალბათ, ასე ზოგადად ფოიერვერკებს, მაგრამ ქვეყანაში 21 მარტს გამოცხადდა საგანგებო მდგომარეობა!
მართალია, მთავრობამ ისაუბრა, რომ მინიმუმამდე უნდა შეამცირონ ხარჯი მუნიციპალიტეტებმა და შესაძლოა, ტენდერებიც კი გააუქმონ, რადგან მეტი თანხის მობილიზება შეძლონ, საჭიროების შემთხვევაში, მაგრამ როცა საქმე ფოიერვერკს ეხება – იქ თანხა არავინ უნდა დაზოგოს.
ხელშეკრულებაში, რომელსაც მერიამ ხელი მოაწერა ცალკე თავი აქვს მიძღვნილი ფორს-მაჟორს და ჩამონათვალში, რა დროს შეიძლება დადგეს ფორს-მაჟორი, საპატიო ადგილი უჭირავს ეპიდემიას.
მიუხედავად იმისა, რომ ფორს-მაჟორის შემთხვევაში, მხარეს (ამ შემთხვევაში) თბილისის მერიას, ყოველგვარი ჯარიმის გარეშე შეეძლო ხელშეკრულების გაუქმება – იგი ასე არ მოიქცა.
ამ ყველაფრის შემდეგ, ინფორმაცია, რომ ფოიერვერკებს ჩინეთიდან ჩამოვიტანთ – ალბათ, უკვე წვრილმანია.
შეგახსენებთ, დღეს გავრცელდა ინფორმაცია, რომ 12 აპრილიდან კორონავირუსის პანდემიასთან დაკავშირებით, რუსეთის ფედერაციიდან და მთლიანად ევრაზიული ეკონომიკური კავშირიდან (რუსეთი, ყაზახეთი, ბელარუსი, სომხეთი, ყირგიზეთი) არაერთი სასურსათო პროდუქტის ექსპორტირება აიკრძალა – მათ შორის, წიწიბურის, ბრინჯის, ხახვის, ნივრის…
იმის ნაცვლად, რომ ალტერნატიული გზების ძებნა დაგვეწყო პროდუქტის შესაძენად, გილოცავთ, ჩვენ ჩინეთიდან ჩამოგვივა ფოიერვერკები.
სხვა ქვეყანაში, ამ ფაქტს, ფოიერვერკის კი არა, დედაქალაქის მერის “აფეთქება” მოჰყვებოდა!
საქართველოში კი 94, 441 ლარის ღირებულების ფოიერვერკი აფეთქდება.
კომენტარები