“მის შეურაცხყოფაზე ოფიციალური სამთავრობო ნებართვაა გაცემული” – ზურაბ გურული

“აზრის თავისუფალი გამოთქმა, ე.წ. free speech, ნებისმიერ ქვეყანაში შეიძლება სარისკო იყოს, მათ შორის ყველაზე დემოკრატიულ ქვეყნებში. ამ რისკების ამპლიტუდა მერყეობს სამსახურისა და კარიერის დაკარგვიდან სიცოცხლის დაკარგვამდე. ერთია მხოლოდ, ჭეშმარიტად აღშფოთებული საზოგადოებისათვის ის კი არ არის მთავარი, თუ ვინ გააჟღერებს ამ თემას, არამედ თავად თემა. ასე რომ, ეს ბუნებრივი მოვლენაა და დედამიწის ზურგზე ჯერჯერობით არცერთ ქვეყანას არ გააჩნია ისეთი დემოკრატია, რომელიც შეძლებს იმ ადამიანთა დაცვას, რომლებსაც ყველა თემაზე თავისუფლად საუბარი სურთ.

ლევან ბერძენიშვილთან დაკავშირებულ მოვლენებს არც აზრის თავისუფლად გამოთქმასთან აქვს რაიმე საერთო და არც კონსერვატორული საზოგადოების სენტიმენტების შეურაცხყოფასთან. შესაბამისად, კომიკურია ქართველ მოაზროვნეთა ღრმა წიაღსვლები ამ მიმართულებებით.

„ოცნების“ დეპუტატ ლევან ბერძენიშვილს არანაირი პრობლემა არ ჰქონია საკუთარი პიკანტური თუ ერეტიკული აზრების თავისუფლად გამოსათქმელად; ისევე როგორც არ ჰქონია ეს პრობლემა ცხონებულ ოთარ რამიშვილს, მთელი ხმით როცა მღეროდა: „ეგ თქვენი მეფე ერეკლე, ყვერებით დასაკიდიაო“. რაღაც არ მახსენდება ამ სიმღერით აღშფოთებული თბილისელები (პრინციპში არც თელაველები ).

რობერტ სტურუამ „ვეფხისტყაოსანი“ რომ გააშარჟა, (რისი უფლებაც მას ნამდვილად ჰქონდა, რადგან თავისუფალ ქვეყანაში ყველას აქვს უფლება იყოს “იმის იგი”), არც ამაზე გადარეულა ვინმე იმ ხარისხით, რომ ქუჩაში გაელანძღა რეჟისორი. აბა რა მოხდა ახლა? არც არაფერი; ლევან ბერძენიშვილი ამჟამად საძულველი ოპოზიციის ერთერთ გავლენიან სპიკერად მიიჩნევა და მის შეურაცხყოფაზე ოფიციალური სამთავრობო ნებართვაა გაცემული. ეს არის სულ. ამიტომ არის ეს მოვლენა თავისი შინაარსით უბანძესი, თორემ ქართველები საკმაოდ ტოლერანტული და ლიბერალური ხალხია ზოგადად.”