აშშ-ს მასაჩუსეტის უნივერსიტეტის ქართველი პროფესორი, ზურაბ გურული:
სასამართლო რომ გადაიდებოდა, ეს თავიდანვე ცნობილი იყო ნებისმიერი მოაზროვნე ადამიანისათვის. როდესაც ექიმები ამბობენ, რომ პაციენტს კიდევ რამდენიმე თვე აქვს დარჩენილი, მედიცინაში ჩაუხედავი ხალხი იფიქრებს, რომ ეს რამდენიმე თვე გარანტირებულია და არ იჩქარებენ.
არადა, ასეთი განცხადება ზუსტად უნდა იყოს ფორმულირებული. სინამდვილეში, როდესაც პაციენტზე იტყვიან რომ მას რამდენიმე თვე აქვს დარჩენილი, ეს იმას ნიშნავს, რომ ეს არის მაქსიმუმი, რამდენ ხანსაც შეიძლება გაძლოს ამ ადამიანმა, დარჩენილი სასიცოცხლო რეზერვების მაქსიმალურად გამოყენების შემთხვევაში. თუმცა, რამდენიმე თვის სიცოცხლის ინტერვალში შესვლა პრაქტიკულად ტერმინალურ სტადიაში შესვლას ნიშნავს და ამ სტადიაში სიკვდილი შეიძლება დადგეს ნებისმიერ მომენტში. მითუმეტეს, ამის განცხადება მაშინ, როდესაც არც დიაგნოზი იცი ზუსტად და მხოლოდ კლინიკურ შედეგზე აპელირებ, მიუტევებელი შეცდომაა. ასეთი პაციენტის სიცოცხლე შეიძლება შეწყდეს ნებისმიერ მომენტში და ვერავინ დადებს გარანტიას, რომ რეანიმაციული ღონისძიებები წარმატებული იქნება. ასეთი რამ რომ მოხდეს, იურისტები იტყვიან, რომ ექიმთა განცხადებების თანახმად ეგონათ, მათ განკარგულებაში რამდენიმე თვე იყო.
გარდა ამისა, გამოქვეყნებული მასალების საფუძველზე უპრობლემოდ შეიძლება დასკვნა, რომ პატიმარი პრეზიდენტის სამედიცინო მომსახურება ახლოსაც არ არის საერთაშორისო სტანდარტებთან და უხეში ეთიკური და კლინიკური შეცდომებით გამოირჩევა. (იურიდიულზე საერთოდ საუბარიც კი არ ღირს).
რატომ არის ამ ფაქტის გააზრება მნიშვნელოვანი საქართველოს ნებისმიერი მოქალაქისათვის. იმიტომ, რომ პატიმარი პრეზიდენტის მიმართ მოპყრობა პრაქტიკულად ამკვიდრებს სტანდარტებს, რომლებიც ძალიან შორს არის საერთაშორისო ნორმებისაგან; შესაბამისად, საქართველოს მოქალაქეებიც ანალოგიურ, საერთაშორისო სტანდარტებისაგან მკვეთრად განსხვავებულ სამედიცინო და იურიდიულ მომსახურებას მიიღებენ.
საქართველოს სახელმწიფო ინსტიტუტები ვერასოდეს შედგებიან ჭეშმარიტ სახელმწიფო ინსტიტუტებად და ქვეყანაც შესაბამისად დარჩება სუბსტანდარტულ, ფსევდო-დემოკრატიულ წარმონაქმნად, სადაც ყოველი მოქალაქის სიცოცხლე და ჯანმრთელობა იქნება საერთაშორისო კრიტერიუმებისაგან მკვეთრად განსხვავებული და უხარისხო.
და როდესაც მომავალში თქვენ, თქვენი ოჯახის წევრები და ახლობლები აღმოჩნდებით უგულო, უვიცი ექიმებისა და ცინიკოსი, კორუმპირებული იურისტების ხელში, გაიხსენეთ, რომ თქვენი გულგრილობით თავად მიეცით მათ მწვანე შუქი.
კომენტარები