„ლელოს“ წევრმა, სალომე სამადაშვილმა საქართველოს პრემიერ-მინისტრს პარლამენტში სიტყვით გამოსვლისას მიმართა და თქვა:
„ძალიან რთული მოსასმენი იყო პრემიერ-მინისტრის გამოსვლა, რომელმაც ისევ არჩია, ბევრი ტყუილი ეთქვა, ნაცვლად იმისა, რომ რაიმე მიღწევებზე ესაუბრა. საკუთარი სამშობლოს მიმართ სიბრალული გამიჩნდა და მივხვდი, რომ ძალიან სწორი მოთხოვნაა ევროკავშირის მხრიდან, როდესაც დეოლიგარქიზაციას გვთხოვენ, რადგან ბერა ივანიშვილის თანაშემწე პრემიერ-მინისტრი იყოს, ეს უნდა დასრულდეს, რომ საქართველოს მიეცეს შანსი, გახდეს ევროპული ქვეყანა.
ათი წელი გავიდა, რაც ხელისუფლებაში ხართ. თქვენი ხელისუფლების ერთადერთი მიღწევა იყო, რომ ძალიან უგემოვნოდ შერჩეული მუსიკის ქვეშ ხელი მოაწერეთ იმ შეთანხმებებს, რომლებზეც იმუშავა თქვენმა წინამორბედმა ხელისუფლებამ და სულ მაინტერესებდა, შალახო რატომ აირჩიეთ ასოცირების შეთანხმების გაფორმებისას.
უცნაური გემოვნება გაქვთ როგორც მუსიკაში, ასევე პოლიტიკაში, რადგან თქვენ, ბატონო ირაკლი, გგონიათ, ჩახვალთ ევროპაში ყველაზე მარგინალიზებულ, ევროპაში ყველაზე გარიყულ ლიდერთან, ბატონ ორბანთან და შემდეგ მოატყუებთ ქართველ ხალხს, რომ ორბანი, რომლის წასვლასაც ელოდება მთელი ევროპა ხელისუფლებიდან და ჯერჯერობით არ ართმევენ უნგრეთს ევროპულ საბჭოში ხმის მიცემის უფლებას, რომ ორბანი იქნება თქვენი ლობისტი. რუსეთის ტროას ცხენად მონათლული ორბანი იქნება თქვენი ლობისტი ევროკავშირში, როდესაც მთელი ევროპული საბჭო და მთელი პოლიტიკური სპექტრი არის შეთანხმებული, რომ თქვენს ხელისუფლებას აქვს უკუსვლა ყველა მიმართულებით და მაინტერესებს, რას აპირებთ. თქვენი პარტია აპირებს თუ არა, დატოვოს ევროპელი სოციალისტების შემადგენლობა, რადგან მათაც მიაჩნიათ, რომ ოლიგარქი არის ივანიშვილი.
მიაჩნიათ, რომ ქვეყანაში არის პოლიტიზებული მართლმსაჯულება და მათაც მიაჩნიათ, რომ თქვენს ხელისუფლებას არ ეკუთვნის კანდიდატის სტატუსი ასე თუ გააგრძელებთ. ვის ატყუებთ, რომ ჩვენი ქვეყნისთვის კანდიდატის სტატუსის მიღებას პოლიტიკური მხარდაჭერა არ სჭირდება.
მესმის, თქვენ არაფერი იცით ევროკავშირის, მაგრამ რადგან ევროპასთან ურთიერთობები ჩემი ხელმძღვანელობის პირობებში ნამუშევარ ხალხს ჩააბარეთ, ამ ხალხმა იცის და ამ ხალხს მოვუწოდებ, გამოიჩინეთ პატრიოტიზმი და უთხარით სიმართლე ამ კაცს, რომელიც მხოლოდ ივანიშვილის ინტერესებს წარმოადგენს და საერთო არაფერი აქვს ამ ქვეყნის სახელმწიფო ინტერესებთან. ვიდრე ასე ისაუბრებს ქვეყნის პრემიერ-მინისტრი ამ ტრიბუნიდან, ეს სახელმწიფო ვერანაირ კანდიდატის სტატუსს ვერ მიიღებს.
დღეს ჩვენ ისტორიული არჩევანი გვაქვს. ნოე ჟორდანიამ მიმართა საკუთარ ხალხს, რომ არჩევანი გვაქვს ბოლშევიზმსა და ევროპას შორის და უნდა ავირჩიოთ ევროპა. რამდენიმე თვეში ბოლშევიკები შემოვიდნენ ამ ქვეყანაში. არ მოგცემთ თქვენ შესაძლებლობას, რომ ის ისტორიული შესაძლებლობა, რომელიც დღეს უდგას ქვეყანას, რუსეთს და ევროპას შორის, რუსეთის სასარგებლოდ გადაწყვიტოთ.“
კომენტარები