უკრაინის პრეზიდენტი, ვოლოდიმირ ზელენსკი აცხადებს, რომ ისრაელთან უკრაინის ურთიერთობები უფრო თბილი გახდა.
„ყველას უხერხულობას უქმნის ჩვენი ურთიერთობები, თუმცა ისინი ბოლო დროს უფრო თბილი გახდა. პაუზის შემდეგ ჩვენ ვხედავთ წინ გადადგმულ ნაბიჯებს. ჩვენ ისრაელთან თანამშრომლობის დასაწყისში ვართ. და ეს არის დადებითი ტენდენცია ისრაელის მხრიდან. მადლობელი ვარ ამისთვის“, – აღნიშნა უკრაინის პრეზიდენტმა.
როგორც ზელენსკიმ აღნიშნა, ისრაელის დაზვერვის მონაცემები ადასტურებს უკრაინის დაზვერვის ხელთ არსებულ ინფორმაციას, რომ რუსეთმა უკრაინის წინააღმდეგ 400-ზე მეტი ირანული დრონი გამოიყენა.
ვოლოდიმირ ზელენსკის, ისრაელისგან უფრო მეტი მხარდაჭერის იმედი აქვს.
„ისრაელმა იცის, რა არის ომი. მიგვაჩნია, რომ ისრაელმა უფრო მეტად უნდა დაუჭიროს მხარი უკრაინას. ჩვენ ამას 24 თებერვლის შემდეგ ველოდებით. ჩვენ ვხედავთ, რომ ისრაელის მოსახლეობა მხარს უჭერს უკრაინელებს, თუმცა ჩვენ გვჭირდება ისრაელის პოლიტიკური ლიდერობა“, – დასძინა უკრაინის ლიდერმა.
კომენტარები