უკრაინის პრეზიდენტის ოფისის ხელმძღვანელის მრჩეველი მიხაილო პოდოლიაკი ამერიკელი მილიარდერის, ილონ მასკის წინადადებას გამოეხმაურა, რომელმაც რუსეთ-უკრაინის ომის მოგვარების გეგმა წარმოადგინა. ინფორმაციას Deutche Welle ავრცელებს.
„მე მასკზე უკეთესი წინადადება მაქვს. უკრაინა საკუთარ მიწას ათავისუფლებს, მათ შორის ანექსირებულ ყირიმს, ხოლო რუსეთში განხორციელდება დემილიტარიზაცია და მას ბირთვულ იარაღს ართმევენ. ამის შემდეგ მოსკოვი უკვე ვერავის დაემუქრება. სამხედრო დამნაშავეებს კი საერთაშორისო სასამართლო გაასამართლებს“, – განაცხადა პოდოლიაკმა.
ცნობილმა ამერიკელმა მილიარდერმა კომპანიების, Tesla-ს და SpaceX-ის დამფუძნებელმა ილონ მასკმა უკრაინას და რუსეთს შორის ომის მშვიდობიანი მოგვარების გეგმა წარმოადგინა.
მასკმა განაცხადა, რომ თუ უკრაინელების მხრიდან საფრთხე ყირიმს დაემუქრება, რუსეთი საყოველთაო მობილიზაციას დაიწყებს, რაც ორივე მხრიდან კატასტროფული რაოდენობის ადამიანების დაღუპვას ნიშნავს. მან ასევე დაამატა, რომ რუსეთის მოსახლეობა უკრაინის მოსახლეობის რაოდენობას სამჯერ აღემატება და ტოტალური ომის შემთხვევაში უკრაინის გამარჯვება ნაკლებად სავარაუდოა.
„თუ უკრაინელი ხალხი თქვენთვის ძვირფასია, მოძებნეთ მშვიდობის დამყარების გზები“, – დაწერა მასკმა.
კომენტარები