,,ილონ მასკმა შესაძლოა რაღაც ისეთი იცის, რაც ჩვენ ჯერ არ ვიცით” – რა ვერსია აქვს ზურაბ გურულს

ექიმი ზურაბ გურული ილონ მასკის ,,ტვიტზე”:

ილონ მასკი თუ გამოვიდოდა ფსბ-ს შექმნილი მესიჯით, ნაკლებად ველოდი, მაგრამ რაღაც სერიოზული რომ მოხდებოდა ამ მიმართულებით, ამაში ეჭვი არ მეპარებოდა.
სწორედ რამდენიმე დღის წინ ვწერდი რუსეთის შესაძლო მომავლის გათვლაზე და გუშინ კი ამერიკულ იზოლაციონიზმზე ?
და მაინც, რაზე აკეთებს გათვლას მასკი?
ცხადია კონსერვატიულ ამერიკაზე, რომლის მინიმუმ 2/3-იც ფიქრობს, რომ ამერიკა არ უნდა ერეოდეს არანაირი გზით რუსეთის საქმეებში და რომ უკრაინისათვის მრავალმილიარდიანი მხარდაჭერა შეცდომაა. ამ მიმართულებით მუშაობს ახლა ფსბ და სწორედ ამიტომ ცდილობს პუტინი ყველა მეთოდით დროის მოგებას.
მართალია ამერიკული იზოლაციონიზმის შემქმნელები ჯორჯ ვაშინგტონი და თომას ჯეფერსონი იყვნენ, ანუ თავად დამფუძნებელი მამები, მაგრამ კოლონიურ ამერიკაში თუ ამ მიმართულებას რაღაც ლოგიკა გააჩნდა, დღევანდელი ამერიკისათვის სრული ნონსენსია. იყო დრო, კერძოდ მეოცე საუკუნის დასაწყისში, როდესაც ამერიკის საემიგრაციო პოლიტიკაში პირდაპირ ეწერა, რომ ქვეყანა არ მიიღებს: “იმბეცილებს, იდიოტებს, ეპილეფსიით შეპყრობილთ და სხვა მენტალური პრობლემების მქონეთ”. მას შემდეგ ბევრი დრო გავიდა. ამერიკა გაიზარდა. იზოლაციონიზმის ბოლო სერიოზული აფეთქება მეორე მსოფლიო ომის წინ მოხდა და მისი ლიდერი ჩარლზ ლინდბერგი იყო. უახლოეს წარსულში კი სამწუხაროდ ტრამპიზმი გადაიზარდა აგრესიულ იზოლაციონიზმში, რადგან ტრამპმა ვეღარ შეძლო მარჯვნივ მკვეთრად გადახრილი საჭის კონტროლი და თავად იქცა მემარჯვენეთა უკიდურესად აგრესიული ფრთის მძევლად. ტრამპს ჰქონდა ძალიან ლოგიკური და ეფექტური შტრიხები თავის პოლიტიკაში; თუნდაც ნატო-ს ევროპელი წევრების გააქტიურება და ფინანსური პასუხისმგებლობის საკითხი; მაგრამ მან ვერ შეძლო პოლიტიკურად გაზრდა ბორის ჯონსონივით და საბოლოოდ უკონტროლო უკიდურესობაში გადავარდა. ამჟამინდელ რესპუბლიკურ პარტიას ძალიან უჭირს თავისი რადიკალების კონტროლი. არადა, ეს რადიკალები ქმედით, ყველაზე აქტიურ და ყველაზე მრავალრიცხოვან სპექტრს წარმოადგენენ პარტიაში და მათ გარეშე საერთო-პარტიული გამარჯვება გამორიცხულია. ნოემბრის არჩევნების შემდეგ, დიდი ალბათობით რესპუბლიკური პარტია მოიპოვებს უმრავლესობას კონგრესშიც და სენატშიც. სწორედ ამაზე აკეთებს ლოგიკურად გათვლას პუტინი.
ახალი სენატი და კონგრესი ძალაუფლებას 2023 წლის იანვრიდან მიიღებს და რუსები ცდილობენ მანამდე დროის მოგებას. ცხადია ლენდ-ლიზის და სხვა, უკვე ძალაში შესული პაკეტების შეჩერება არ და ვერ მოხდება, მაგრამ პუტინი ალბათ ფიქრობს, რომ გარკვეულ ეფექტურ გარდატეხას მიიღებს პროპაგანდისტული დივერსიის მიმართულებით.
ცხადია, შორს ვარ იმ აზრიდან, რომ მასკი, ან თუნდაც ტრამპი რუსეთის გავლენის აგენტები არიან. ეს უბრალოდ აბსურდია. ისინი უპირველეს ყოვლისა პოპულისტები არიან და ცდილობენ ახალი პოლიტიკური “ისტაბლიშმენტის” შექმნას ტრადიციული პარტიების გვერდით, რაც მათ ერთადერთობას და უნიკალურობას გაუსვამს ხაზს.
დარწმუნებული ვარ, პრეზიდენტი ზელენსკი და მისი გუნდი აცნობიერებენ, რომ მათი ე.წ. “ფანჯარა” პერიოდი სადღაც იანვრის ბოლომდეა და მანამ მაქსიმალურად ფორსირებულად შეეცდებიან რუსეთის განდევნას ოკუპირებული ტერიტორიებიდან. პუტინი კი თავისი ჩაფლავებული რეზერვისტების ფონზე უფრო და უფრო უახლოვდება ბირთვული კარტის გათამაშების ზღურბლს.
მასკი სერიოზული მოთამაშეა მსოფლიოს სოციალურ კლუბში, ამიტომ მისი გავლენის იგნორირება შეცდომა იქნება. სამარცხვინოდ ყალბი იყო მისი აპელირება ჰუმანიტარულ პრინციპებზე, თითქოს უკრაინელებზე მეტად აღელვებდეს დაღუპული უკრაინელი მოქალაქეების ბედი. ზელენსკიმ აუცილებლად უნდა აჯობოს მასკს მსოფლიო პოპულარობით. უკან დასახევი გზა მას არა აქვს.

P.S. თუმცა … აუცილებლად გასათვალისწინებელია ის ფაქტიც, რომ მასკს უძლიერესი სადაზვერვო შესაძლებლობები აქვს თავისი თანამგზავრებით და შესაძლოა რაღაც ისეთი იცის, რაც ჩვენ ჯერ არ ვიცით და რაზეც ხმამაღლა არ საუბრობენ პოლიტიკოსები. დიდი ალბათობით ეს ბირთვული იარაღის გამოყენების უკიდურესი საშიშროებაა. სხვანაირად ძნელი ასახსნელია მისი ასეთი “ფერიცვალება”.

„უკრაინა-რუსეთის მშვიდობა…” – ილონ მასკის სკანდალური ,,ტვიტი”