აშშ-ს მასაჩუსეტის უნივერსიტეტის ქართველი პროფესორი, ზურაბ გურული:
“FBI- ს მიერ ჯონს ჰოპკინსის კლინიკის ანესთეზიოლოგის ანა გაბრიელიანის და მისი ტრანსგენდერი ქმრის დაკავება ჯაშუშობის ბრალდებით მიუთითებს, რომ ამერიკული კონტრდაზვერვა ემზადება რუსული აგენტურული ქსელის დივერსიული ტალღის პრევენციისათვის.
ამ კონკრეტულ შემთხვევაში ყველაზე საინტერესოა ის ფანატიზმი, რომელიც ამერიკის წამყვანი კლინიკის წარმატებულ ექიმს აქვს. იგი მზად იყო დაეთმო თავისი კარიერა, უზრუნველი ცხოვრება რუსეთის ინტერესებისათვის.
სერიოზული ქსელი აქვთ ამერიკაში რუსულ რელიგიურ სექტა-ორგანიზაციებსაც. მათი მესიჯი იყო და არის: – პუტინი მესიის მახვილია და მან უნდა დაუბრუნოს კონსტანტინოპოლი ქრისტიანულ სამყაროს-. კომიკურად მიგაჩნიათ ალბათ. არადა, არაერთი ექიმი და სხვა ინტელექტუალური პროფესიების წარმომადგენლები ჰყავთ წევრებად. სხვათაშორის, ამ რუსულ ორგანიზაციებს საქართველოშიც აქვთ ფილიალები და იქაც ჩადიოდნენ და ჩადიან ამერიკელი რუსები ანალოგიური გზავნილებით.
პანიკა და ისტერიკა ცხადია არ არის სასურველი, მაგრამ ბირთვული პროვოკაციების დრო ახლოვდება და სერიოზული სიფრთხილეა საჭირო. მთელი მსოფლიოს ტერორისტული ქსელები განსაკუთრებულ რეჟიმში მუშაობენ ახლა. მსოფლიოს ერთერთი უდიდესი სადაზვერვო სექტორი, რუსული სექტორი, მათ მხარეზეა. პუტინს სხვა გამოსავალი აღარ აქვს დარჩენილი. შეცდომაა იმაზე ფიქრი, რომ ბირთვულ იარაღს ეს მონსტრი მაინცდამაინც ბრძოლის ველზე გამოიყენებს პირველად.
ანა გაბრიელიანი ვინმე გაჭირვებული ლტოლვილი კი არა, წარმატებული ექიმი იყო მსოფლიოს წამყვან კლინიკაში; წარმოიდგინეთ მისი ფანატიზმის ხარისხი და მერე კი ისეთი ადამიანის, რომელსაც ბევრი არაფერი აქვს დასაკარგი…
P.S. იმედია ის ჰარიფებიც დაფიქრდებიან, რომლებიც დღემდე ვერ მიმხვდარან, თუ რატომ არ უშლის პუტინი “დეზერტირების” არმიებს, დატოვონ რუსეთის ტერიტორია და “თავის გადასარჩენად” მსოფლიოს შეესიონ.”
კომენტარები