ლევან ჯავახიშვილი
„ალიას“ ესაუბრება „ლეიბორისტული პარტიის“ გენერალური მდივანი, გიორგი გუგავა.
– ერთ საფრთხეზე არავინ ლაპარაკობს და ხალხი კი თავად ვერ ხვდება. რუსეთთან უვიზო რეჟიმის დაწესების მოწინააღმდეგებზე, საქართველოში ჩამოსული რუსების ხელგაშლილობით აღფრთოვანებული რომ არიან, მათზე მოგახსენებთ. კი, დღეს აჭარაშიც, თბილისშიც ტურისტულ სფეროში რუსები ბევრ ფულს ხარჯავენ, მაგრამ 3-4 წელიწადში, მათი კონკურენტები გახდებიან – ქართველის სასტუმროს გვერდით უკეთეს სასტუმროს ჩადგამენ, მათი რესტორნებისა და კაფეების გვერდით-უკეთეს რესტორნებსა და კაფეებს და მერე, აქ მართლა ტურისტად ჩამოსული რუსი, რუსის რესტორანში შევა და არა ქართველისა. ტურ-ოპერატორებიც ეგენი გახდებიან, თავად ჩამოიყვან რუს ტურისტებს, ქართველებს დაიქირავებენ და ამუშავებენ ბევრ აქაურს გააკოტრებენ რუსები, ბევრს შემოსავალს შეუმცირებენ და ეს არა მარტო ტურისტულ ბიზნესს შეეხება. რამეს ვაჭარბებ?
– აბსოლუტურად სწორი ანალიზია. მით უმეტეს, ჩვენ რუსული ადმინისტრაცია გვიზის ხელისუფლების სახით და ყველაზე დიდი საფრთხე ეს გახლავთ. ყველანაირად უწყობენ ხელს, რომ რუსეთის მოქალაქეები აქ დამკვიდრდნენ. მეორე, ტურისტის ჩამოსვლა არ არის საფრთხე. როდესაც რუსეთიდან ჩამოსული აქ გიხსნის ბიზნესს, აქ ყიდულობს ბინებს, სახლებს და ახლა უკვე აგარაკებსაც, ის სტუმარი და ტურისტი აღარ არის. ყიდულობს საქართველოს ბინადრობას და ეს უკვე ლამის საქართველოს მოქალაქეობის ტოლფასია. კი, ეგრე მოხდება, როგორც თქვით. დიდი ფულით არის ჩამოსული ბევრი რუსეთიდან და სადაც სწრაფი მოგებაა, პირველ რიგში, იქ დააბანდებენ ფულს. პირველ რიგში, ეს ტურიზმის სფეროა და მალე გაუწევენ რუსი ბიზნესმენები ჩვენსას კონკურენციას და მოუგებენ, რადგან ვისაც დიდი ფული აქვს, ის იგებს ასეთ კონკურენციაში. კი, 3-4 წელიწადში თუ 10 წელიწადში ბევრ ქართული კომპანიას გაყრიან რუსები ქართული ბაზრიდან. 10 წელიწადი არაფერია ისტორიისთვის, ერთი გაელვებაა. გარდა ამისა, რუსები საქართველოს იყენებენ ფულის „გასარეცხად“. ზოგიერთი ბიზნესი აქ თვალის ასახვევად სჭირდებათ, სანქცირებულია რუსული ბიზნეს-ელიტა და სანქციების თავის ასარიდებლად, ფულის „გასარეცხი“ საშუალებაა ეს ბიზნესები. ეს სად და როდის დაგვხვდება წინ ძალიან ცუდად, კიდევ ცალკე საკითხია. დიდ უბედურებაში ვართ გახვეულნი. ამ საფრთხებს გათვლა სჭირდება, პრევენციული ღონისძიებები სჭირდება. სახელმწიფო ინსტრუმენტები იმისთვის არის საჭირო, რომ ამგვარი საფრთხეებისგან დაიცვას ჩვენი მოქალაქეები. ამ ინსტრუმენტების მფლობელები მტერთან, რუსეთთან არიან შეკრულნი და მათი გამოყენების იმედი არ უნდა გვქონდეს. ეს საფრთხეები რომ თავიდან ავირიდოთ, რომ გადავრჩეთ, დემოგრაფიული კატასტროფა რომ შევაჩეროთ და ერი გადარჩეს ფიზიკურად, სოციალური გარემო რომ შევცვალოთ, პოლიტიკური სისტემა რომ შეიცვალოს. ასეთ დროს კი ერთდერთი გამოსავალი არსებობს – ხელისუფლება უნდა შეიცვალოს.
– სოსო გოგაშვილმა განაცხადა, რომ მას ციხეში, შს მინისტრმა, ვახტანგ გომელაურმა კონკრეტული მითითებით ოთხჯერ დაურეკა, როდესაც ის საკნიდან ციხის აბანოში გაჰყავდათ. ეს ზარები განხორციელდა 28 ივლისიდან 5 აგვისტოს ჩათვლით. კომიკურია, რომ პენიტენციურმა სამსახურმა განაცხადა, რომ ზუსტად ამ დღეებში სათვალთვალო კამერების ჩანაწერები არ არსებობს. ახლა ვითომ არკვევენ, კამერები არ მუშაობდა თუ ჩანაწერები წაშალეს. ეს რას ნიშნავს?
– ეს დასტურია, რომ ასეთი საუბრები ნამდვილად შედგა გოგაშვილსა და გომელაურს შორის, მართლა უთხრა გომელაურმა, რომ ბიძინა ივანიშვილი აღარ ეხსენებინა და შემდგომშიც, რასაც და როგორც თავად ეტყოდა, ის ჩვენებები მიეცა გოგაშვილს. ეს ყველაფერი პირდაპირ დაამტკიცა ხელისუფლებამ, მაინც და მაინც იმ დღეებისა და იმ კამერების ჩანაწერები არ არის, რომელთაც უნდა დაემტკიცებინათ, საკნიდან გოგაშვილის ციხის აბანოში გაყვანის და იქიდან ტელეფონზე საუბრის ფაქტები. ახლა გოგაშვილმა რომ თქვას, ამ 9 დღეში სხვა სახის დანაშაულებებს სჩადიოდნენ ჩემს წინააღმდეგო, ვერა ამას უარყოფს ხელისუფლება, ყველაფერი დამაჯერებელი იქნება, რასაც გოგაშვილი იტყვის.
– ახლა გოგაშვილმა კი არ უნდა ამტკიცოს, რომ ეს საუბრები მასსა და ვახტანგ გომელაურს შორის შედგა, ხელისუფლებამ უნდა ამტკიცოს, რომ არ შედგა ეს საუბრები და საამისოდ მტკიცებულებები არ გააჩნია. სერიოზული კოზირი მისცეს გოგაშვილს, ამ ნაწილში სტრასბურგის სასამართლოში, ფაქტიურად, მოგებული აქვს საქმე, არა?
– კი, ასეა. მტკიცებულების ტვირთი, საერთაშორისო სამართლებრივი ნორმებითაც, ხელისუფლებას ეკისრება და ესენი ვერ დაამტკიცებენ ვერაფერს. 29 კამერის ჩანაწერი წაიშალა. ყველა კამერას ერთ დღეს შეეყარა ვირუსი და მაინც და მაინც იმ კამერებს, რომლებიც საკნიდან აბანომდეა განლაგებული? ეს არის სრული აბსურდი. კაი, კამერები გაითიშა, სატელეფონი ანძებიც გაითიშა? გოგაშვილი ყველა სატელეფონო ნომერს ასახელებს, საიდანაც გომელაურმა დარეკა და ესაუბრა. სატელეფონო ანძებზე ხომ აისახა ეს ზარები, ნომრები, საიდან სად დაირეკა. ამოიღონ ეს და ნახონ. ფაქტებს თვითონ აქრობენ. როდესაც დანაშაული ხდება, გამოძიება როდესაც იწყება, გამომძიებელი პირველ კითხვას იმას სვამს, თუ ვის აწყობდა ამ დანაშაულის ჩადენა. დავსვათ ეს კითხვა, ვის აწყობდა კამერების ჩანაწერების გაქრობა? ცხადია, ხელისუფლებას. ამ საქმეში ყველაფერი დღესავით ნათელია.
კომენტარები