სოსო გოგაშვილის დაცვის უფროსს აღკვეთის ღონისძიებად 3 000 ლარიანი გირაო შეეფარდა – პროკურატურა 5 ათასს ითხოვდა. გადაწყვეტილება მოსამართლე სერგო მეთოფიშვილმა მიიღო.
დაცვის მხარე კი მიიჩნევდა, რომ გირაოს მოთხოვნის საფუძველი არ არსებობდა, რადგან არ არსებობს ბრალდებულის მიმალვისა და სხვა სახის დანაშაულის ჩადენის საფრთხე.
შეგახსენებთ, სუს-ის ყოფილი მაღალჩინოსნის, სოსო გოგაშვილის დაცვის უფროსს, ალექსანდრე სამხარაძეს ბრალი გუშინ, საბრძოლო მასალის უკანონო შენახვის მუხლით წაუყენეს.
სამხარაძის საცხოვრებელ სახლში 16 ივლისს ჩხრეკა ჩატარდა, რის შედეგადაც ამოიღეს ვაზნები. ადვოკატის თქმით, სამხარაძე წარსულში ძალოვანი უწყების თანამშრომელი იყო და საშტატო იარაღიც ჰქონდა, თუმცა უწყებიდან წასვლის შემდეგ იარაღი ჩააბარა, ხოლო ტყვიების ჩაბარება დაავიწყდა, რამაც მისი სისხლის სამართლის პასუხისგებაში მიცემა გამოიწვია. ადვოკატის თქმით, სწორედ ეს ტყვიები იპოვეს სამხარაძის სახლის ჩხრეკისას სამართალდამცველებმა.
კომენტარები