“არანაირი გადახვევა რომ არ უნდა მოხდეს ჯანდაცვის სამინისტროს რეკომენდაციებიდან, ეს თითოეული ჩვენგანის უპირველესი პასუხისმგებლობაა, თუმცა მთავრობა კარგად უნდა გაერკვიოს დეტალებში, ადამიანები უსამართლობის მსხვერპლნი რომ არ აღმოჩნდნენ,“ – ასე ეხმაურება პოლიტიკური მოძრაობა „ტრიბუნას“ ლიდერი, დავით ჭიჭინაძე, ეკონომიკის მინისტრის გადაწყვეტილებას, რომ მხოლოდ ის საწარმოები განაგრძობენ მუშაობას, რომელთა გაჩერებაც მთავრობამ მიზანშეწონილად არ მიიჩნია.
“ის, რომ არანაირი გადახვევა არ უნდა მოხდეს იმ წესებიდან, რომელიც ჯანდაცვის სამინისტრომ დაამტკიცა და დაადგინა, ეს თითოეული ჩვენგანის უპირველესი პასუხისმგებლობაა. მითუმეტეს მაღალი გარანტიები უნდა ჰქონდეს თითოეულ დამსაქმებელს, როგორც თანამშრომლების, ასევე მომხმარებლის მიმართ. მაგრამ ეს ასე არ არის. უამრავი ადამიანი მიკავშირდება, რომლებიც ამბობენ, რომ შერჩევით ხდება მუშაობის უფლების მიცემა.
ანუ, როგორც მიყვებიან, და ამის დოკუმენტებიც აქვთ, აკმაყოფილებენ ყველა მოთხოვნას, ყველა წესს, რაც გამოქვეყნებულია, მაგრამ პრობლემა მხოლოდ იმ კომპანიებს არ ექმნება, რომელსაც ხელისუფლებასთან აქვს „მოგვარებული“. იქნება ეს სამშენებლო კომპანია, ავტო-ნაწილების ყიდვა-გაყიდვა, თუ ნებისმიერ მსგავსი სფერო. ამიტომ, ვურჩევდი მთავრობას, მაქსიმალურად კარგად გაერკვიოს დეტალებში და მარტო მინისტრ თურნავას დონეზე ნუ დატოვებენ ამ საკითხს. ამით ამ ისედაც უმძიმეს მდგომარეობაში აღმოჩენილ ადამიანებს, დამატებითი პრობლემებსაც ავარიდებთ და არც უსამართლობის მსხვერპლნი აღმოჩნდებიან”.
ცნობისთვის, დღეს ეკონომიკის მინისტრმა, ნათია თურნავამ საკოორდინაციო საბჭოს დასრულების შემდეგ გამართულ ბრიფინგზე, ყველა კომპანიას და ბიზნესის წარმომადგენლებს მოუწოდა, დაიცვან ყველა რეკომენდაცია და მითითება, უზრუნველყონ თავიანთი დასაქმებულების უსაფრთხოება.
ასევე, დღევანდელი სხდომის შემდეგ თურნავამ განაცხადა, რომ სამშენებლო სექტორის მუშაობას მთლიანად აჩერებენ. თუმცა თბილისის მერიის განცხადების მიხედვით, ეკონომიკური სექტორის წარმომადგენლებმა, რომლებსაც საქართველოს მთავრობის დადგენილებით შეეზღუდათ სამშენებლო საქმიანობის განხორციელების უფლებამოსილება, მშენებლობის უფლების გაგრძელებისთვის უნდა მიმართონ თბილისის მუნიციპალიტეტის მერიას ოფიციალური წერილობით.
კომენტარები