ლევან ჯავახიშვილი
„ალიას“ ესაუბრება ექსპერტი, გია ხუხაშვილი.
-რუსეთთან სავიზო რეჟიმის შემოღებას ითხოვს ხალხი. ესენი არ არიან ამის გამკეთებლები, მაგრამ დავუშვათ, შემოიღეს სავიზო რეჟიმი. ეს უშველის საქმეს?
-საერთოდ, ნებისმიერი ამ ტიპის რისკების პრევენცია, კომპლექსური საკითხია, ერთი კონკრეტული ქმედებით პრობლემა არ მოგვარდება. რა თქმა უნდა, პირველ რიგში უნდა შემოიღო სავიზო რეჟიმი. მით უმეტეს, ამაზე –ომი გინდათო? რომ გვეუბნებიან, სისულელეა. რუსეთს საქართველოსთვის აქვთ დაწესებული უმკაცრესი მკაცრი სავიზო რეჟიმი. საერთაშორისო ურთიერთობებში სარკისებრი ქმედებებია მიღებული ასეთ დროს – დაგიწესა რომელიმე ქვეყანამ სავიზო რეჟიმი? შენც ავტომატურად უწესებ. ეს თავისთავად უკვე გაფილტრავს ამ ყველაფერს, ასეთი ქაოსი არ იქნება და გვეცოდინება, ვინ ტურისტად შემოდის და ვინ სხვა მიზნებისთვის, ვინ რა ვადით შემოდის... წინასწარ, პრევენციულად ფილტრაციის მექანიზმი შეიქმნება. ეს არ არის საკმარისი, სავიზო რეჟიმის შემოღება, ეს არის ფუნდამენტი, საფუძველი. გარდა ამისა, უნდა შეიზღუდოს კომპანიების რეგისტრირება, საბანკო ანგარიშების გახსნა და ვინც მაინც გახსნის, უნდა გაკონტროლდეს მათი ფულადი გადმორიცხვები და გადარიცხვები. თუნდაც, შეიზღუდოს დროებით, გარკვეული ვადით. იგივე, უძრავი ქონების ყიდვა-გაყიდვა და ა.შ. ეს ყველაფერი კომპლექსურად არის გასაკეთებელი, მაგრამ სავიზო რეჟიმი თუ არ დაწესდება, აქედან არაფერი გაკეთდება. მე არ ვამბობ, რომ ყველა რუსს უნდა ავუკრძალოთ რუსეთში შემოსვლა, მაგრამ თუ ვინმე ტურისტად მოდის, რატომ ხსნის საბანკო ანგარიშს? როდის იყო, აქ ჩამოსული ტურისტები ბათუმსა და თბილისში ბინებს და მიწის ნაკვეთებს ყიდულობდნენ?
-ზოგი ფიქრობს, რომ თუ რუსეთთან სავიზო რეჟიმს შემოვიღებთ, რუსეთიდან იმ ქართველებს გამოყრიან, რომელთაც რუსეთის მოქალაქეობა არ აქვთ და დროებითი ჩაწერით ცხოვრობენ რუსეთშიდა ზოგიც არალეგალურად არის იქ. არის ეს საფრთხე?
–ეს ხალხი რუსეთს თვითონ სჭირდება, თორემ აქამდე გამოყრიდა. კიდევ ერთხელ ვამბობ. რუსეთს ხომ აქვს ჩვენთვის სავიზო რეჟიმი დაწესებული. ჩვენც უნდა მივიღოთ შესაბამისი, ადექვატური გადაწყვეტილება და მივიღოთ სავიზო რეჟიმი. რუსეთს თუ ვინმეს გამოყრა უნდა, საამისოდ მიზეზი არ სჭირდება, ამას ისედაც გააკეთებს. 2006 წელს რომ გამოყარეს ქართველები, მაშინ უვიზო რეჟიმი არ გვქონდა რუსეთთან? ილუზიაა, რომ სავიზო რეჟიმს თუ დავუწესებთ, ვინმეს გამოყრიან. კი, რუსეთში ორ კაპიკს შოულობს ხალხი, მაგრამ თავმოყვარეობა ხომ გვაქვს, ბოლოს და ბოლოს. რუსეთმა უკრაინაში თუ სამხედრო წარმატებას მიაღწია, შეიძლება, საქართველოს ინტერვენცია დაიწყოს და რა გინდა იქ, ვერ გავიგე, მით უმეტეს, არალეგალად. თან რუსეთთან საომარ მდგომარეობაში ვიმყოფებით. თუმცა, ეს ჩვენ ვიმყოფებით საომარ მდგომარეობაში, თორემ ჩვენი და მათი ხელისუფლებები ჩახუტუბულები არიან.
კომენტარები