“რატომ უნდა დაკარგონ ჩვენმა შვილებმა, რომლებიც დისტანციურად სწავლობენ წელი თუ სემესტრი – გაუგებარია”

ჟურნალისტი, არჩილ გამზარდია, სოციალურ ქსელში, წერს:

“პრემიერის განცხადებით, აკადემიური წლის გამოცხადება დღის წესრიგში დგას. მაგალითად, ჩემი შვილი სრულფასოვან სასწავლო რეჟიმშია, დისტანციური სწავლების ფორმატით. მასწავლებელთან სკოლაში თუ 4-5 საათს ატარებდა, ახლა ლამის 12 საათიან რეჟიმში გვაქვს კომუნიკაცია. მასწავლებელი უხსნის, იღებს უკუკავშირს, აძლევს სარეკომენდაციო და სავალდებულო დავალებებსაც, ჩემი შვილი აქტიურ რეჟიმშია, ვითარდება, იღებს პროგრამულ სავალდებულო ცოდნასაც და სარეკომენდაციო, სახალისო თუ სხვა ხერხებით, დამატებით ცოდნასაც. ცხადია, ასეა მთელი მისი კლასიც. ასეთი მოცემულობაა 149-ე საჯარო სკოლაში, სხვაგან არ ვიცი.

და ამის ფონზე რატომ უნდა დაკარგოს წელი თუ სემესტრი, ჩემთვის სრულიად გაუგებარია.

ხელისუფლება ამ კუთხითაც და ყველა დანარჩენ საკითხშიც ერთ ქვაბში ყრის ყველას და ეს არაეფექტური მართვაცაა და სრულიად არაადეკვატური მიდგომაც. ამას არც კრიზისების მართვის უნარი ჰქვია, რითიც მთავრობას რატომღაც მოაქვს თავი.

გადადით ეფექტურ მართვაზე, ინდივიდუალური მოცემულობების განხილვაზე. ისედაც დროში უკან დავიხიეთ (ეს ნაწილობრივ ნამდვილად არაა ხელისუფლების ბრალი, ცხადია) და სადაც არსებობს შესაძლებლობა მოქმედების, ნუ შექმნით დამატებით ბარიერებს.

მოინდომეთ და კრიტიკის მიუხედავად, ჩვენც დაგეხმარებით, მიუხედავად ანტაგონისტური დამოკიდებულებებისა.

გადადით ეფექტურ მართვაზე და ხელი შეუწყვეთ იმ კუნძულების არსებობას, რომლებიც სიტუაციის მიუხედავად, ახერხებენ არსებობასა და განვითარებას, როგორც განათლების სფეროში, ისე ბიზნესის თუ სხვა დანარჩენ სფეროში.”