“ქართული ოცნების” თავმჯდომარე კობახიძე ნედ პრაისის განცხადებას პასუხობს და ამბობს:
“თქვენ ვერ გამახსენებთ ვერც ერთ თავდასხმას რომელიმე ქართველი თანამდებობის პირისგან ამერიკის ელჩის მიმართ. არც ერთი ასეთი თავდასხმა არ ყოფილა. ერთადერთი რაც იყო, დაისვა გარკვეული კითხვები ჩვენი მხრიდან, საუბარი არა მაქვს სხვების მხრიდან დასმულ შეკითხვებზე, ჩვენ დავსვით გარკვეული კითხვები ორ თემაზე. პირველი უკავშირდებოდა მოსამართლეზე შესაძლო ზეწოლის ფაქტს საელჩოს კონკრეტული თანამშრომლის მხრიდან. როდესაც ერთ ერთი მოსამართლე ბრალს სდებს აშშ- საელჩოს თანამშრომელს ზეწოლაში ელჩის სახელით, რა თქმა უნდა, ამაზე ჩვენი პასუხისმგებლობაა, რომ დაისვას კითხვები და ეს ვერავითარ შემთხვევაში ვერ შეფასდება, როგორც თავდასხმა”
თუმცა, შეგახსენებთ იმასაც, რომ ელჩზე თავდასხმის გარდა, ნედ პრაისმა სხვა ბრალდებებიც გააჟღერა ქართული ოცნების მიმართ და თქვა: “ვფიქრობ, ყველამ იცით, რომ ევროპულმა საბჭომ საქართველოს მიანიჭა ევროპული პერსპექტივა და რეფორმების გეგმა, რომელიც უნდა შესრულდეს იმისთვის, რომ საქართველომ კანდიდატის სრული სტატუსი მიიღოს. ჩვენ ვიცით, რომ ქართველი ხალხი დიდი უმრავლესობით უჭერს მხარს ევროკავშირში გაწევრიანებას და ჩვენ, რა თქმა უნდა, მხარს ვუჭერთ ამ მისწრაფებას. თუმცა, ბოლო დროს საქართველოს ხელისუფლების ზოგიერთი წარმომადგენლის რიტორიკა, როგორც ჩანს, ცდილობს, ხელი შეუშალოს საქართველოს მოქალაქეებს ამ მიზნისკენ სწრაფვაში.” – ნედ პრაისის განცხადების ამ ნაწილისთვის კობახიძეს პასუხი არ გაუცია.
ირაკლი კობახიძე პასუხს ითხოვს მიხეილ ყაველაშვილის დასმულ შეკითხვებზეც – ემიჯნება თუ არა ელჩი დეგნანი “ომის რიტორიკას” და ჰქონდა თუ არა შეხვედრა ბიძინა ივანიშვილთან უკრაინაში ომის დაწყებამდე.
“როდესაც მარტივი შეკითხვები ისმის, რაზეც ელჩს შეუძლია მარტივად პასუხის გაცემა და წერტილის დასმა და ეს არ კეთდება, ეს რა თქმა უნდა, ეჭვებს აღრმავებს, ეს არ არის არავითარ შემთხვევაში თავდასხმა…”
“ალია” შეგახსენებთ, რომ ყველა ამ კითხვას, დეგნანმა უკვე გასცა პასუხი, რას ითხოვს ქართული ოცნება მისგან, ეს პასუხები თავიდან უნდა გაიმეოროს, თუ არ მოსწონს ეს პასუხები და ითხოვს, აშშ–ის ელჩმა, სასწრაფოდ, სხვა პასუხები მოიფიქროს მათ კითხვებზე – უცნობია!
“ივანიშვილი არასოდეს დამიშანტაჟებია… ეს პარლამენტარი არც ერთ შეხვედრას არ დასწრებია” – ელჩი
“აშშ ყველანაირად ცდილობს, ომი არ გადავიდეს საქართველოზე, თუ ნებისმიერ სხვა ქვეყანაზე” – დეგნანი
კომენტარები