„ეს გაფრთხილება იყო“ – სალომე ზურაბიშვილის რომელ კადრებს დაერევა ხელისუფლება?

ანი დვალიშვილი

როგორც წესი, ზაფხულში საქართველოში პოლიტიკური პროცესები მინელდებოდა ხოლმე და ერთგვარი მიძინების ხანა დგებოდა, მაგრამ ეს ზაფხული გამონაკლისია – სწორედ ზაფხულში აპირებს ოპოზიცია პოლიტიკური ტემპერატურის მაქსიმუმამდე აწევას, რადგან ვადამდელი არჩევნები მოიპოვოს და შემდეგ ხელისუფლების შეცვლას შეეცადოს. შევთანხმდეთ იმაზე, რომ ვადამდელი არჩევნების დანიშვნა, პირდაპირ ნიშნავს ხელისუფლების გადაბარების პროცესის დაწყებას. სწორედ ამიტომ, ოპოზიციის ლიდერები სხვადასხვა კუთხეებს მოედვნენ და ცდილობდნენ, 3 ივლისის აქციაზე ხალხი სწორედ რეგიონებიდან ჩამოეყვანათ. რატომ? იმიტომ, რომ მათი დატოვება აქციაზე უფრო ადვილია, ვიდრე თბილისელების და თბილისის ახლოს მაცხოვრებლების. სწორედ 3 ივლისიდან აპირებს ოპოზიცია (და არა საზოგადოებრივი მოძრაობა), აქციებმა პერმანენტული ხასიათი მიიღოს და უწყვეტ რეჟიმში წარიმართოს. ახლა ამინდები ისეთია, ღამით გარეთ დარჩენა რომ არ „ტეხავს“ და სიბნელეც, პრაქტიკულად 5-6 საათია.

დასვენებისთვის ვერც „დაღლილმა“ ხელისუფლებამ მოიცალა და მუნიციპალიტეტებში მხადრამჭერთა გააქტიურების გარდა, თავადაც გააქტიურდნენ. მმართველმა გუნდმა სასწრაფო წესით შეიმუშავა სამოქმედო გეგმა და ის გრაფიკიც დადო, რომლის მიხედვითაც, ევროკავშირის 12 პუნქტიანი გეგმა უნდა შესრულდეს, მაგრამ ამ გეგმაში არის ერთი მთავარი პუნქტი, რომელიც პირველ ნომრად წერია – დეპოლარიზაცია, რაც დღევანდელი მოცემულობით გამორიცხულია. არ აპირებს ოპოზიცია „ოცნებასთან“ ერთად ამ გეგმის განხორციელებას, რაც იმას ნიშნავს, რომ დეპოლარიზაცია ვერ მოხდება, დანარჩენი კი უბრალოდ აზრს კარგავს. ოპოიზიცია ძალისმიერ მეთოდებს რომ არ მოერიდება, დადასტურებულად შეიძლება ითქვას და ხელის ქნევაზე არც „ოცნება“ რომ არ იტყვის უაარს, ესეც ბევრჯერ ვნახეთ. ამიტომ, პროცესები ძალიან დაემსგავსა დენთის კასრს, რომელიც შესაძლოა ნებისმიერ წამს აფეთქდეს.

 „ხელისუფლება პრეზიდენტს ღიად დაუპირისპირდა და ისიც აგრძნობინა, რომ საჭიროების შემთხვევაში, არც მისი გუნდის წევრებს დაინდობს. საფრანგეთის ელჩის გათავისუფლება, რომელიც სალომე ზურაბიშვილის უახლოესი მეგობარია, ნათელი მინიშნება იყო იმაზე, რომ არ მოერიდნენ ელჩის მოხსნას და შესაბამისად, ქვედა რგოლს საერთოდ არ დაინდობენ. სიტყვაზე მენდეთ, რომ ზურაბიშვილის რეკომენდაციითა და შუამდგომლობით, არა ერთი და ორი ადამიანი მუშაობს მაღალ თუ დაბალ თანამდებობაზე. ეს ყველაფერი კი იმიტომ გაკეთდა, რომ გაჩნდა შიში იმისა, პრეზიდენტმა სააკაშვილის შეწყალებას არ მოაწეროს ხელი და მისი ფრაზა „არა და არასდროს“ უკვე ისე მყრად ვეღარ ჟღერს“, – ეუბნება „ალიას“ „ოცნების“ მაღალჩინოსანი.