“რუსეთი ამიერიდან საგარეო ვალის გარეშე დარჩება” – გიორგი კობერიძე

– უკრაინელებმა ლუგანსკის რაიონში, ქალაქ ლუგანსკთან ახლოს, როდაკოვეში რუსული სამხედრო საწყობები დაბომბეს. რუსული სამხედრო ტვირთი და ჭურვები განადგურებულია. დიდია მსხვერპლი სამხედროთა რიგებშიც.

– უკრაინელებმა კუნძულ ზმეინზე რუსული სამხედრო პოზიციები მაღალი სიზუსტით გაანადგურეს. რუსეთისათვის ზმეინი სასაკლაოდაა გადაქცეული, რომელზეც ძალიან ძვირიან სამხედრო ტექნიკის – მათ შორის რადარებისა და ჰაერსაწინააღმდეგო სამხედრო სისტემების – განთავსება რამდენჯერმე მოუწია და ყველა ჯერზე უკრაინელებმა მათი მიზანში ამოღება სამხედრო ეკიპაჟიანად შეძლეს.

– სიტუაცია მძიმეა ქალაქ სილიჩანსკში, რომელსაც რუსები ქაოსურად ბომბავენ. 110 ათასიანი ქალაქის აბსოლუტური უმრავლესობის ევაკუაცია განხორციელდა. ქალაქში დარჩენილია 15 ათასამდე მოსახლე, რომლებიც ლისიჩანსკის დატოვებას არ ჩქარობენ. მათი ნაწილი ევაკუაციაზე უარსაც კი აცხადებს, რადგან სჯერა რომ რუსეთი მათ არაფერს დაუშავებს. თუმცა სიტუაცია იცვლება მას შემდეგ რაც რუსები ყველას განურჩევლად ბომბავენ – პრო-რუსული ძალების სახლებიც ისეთივე სამიზნეებად იქცევიან, როგორც სხვა დანარჩენი მოსახლეობისა. მეორეს მხრივ, დიდ როლს თამაშობს იმ ადამიანების მონაყოლიც, რომლებმაც სევეროდონეცკის ან ლუგანსკის რაიონის სხვა ქალაქების განადგურება იხილეს რუსების ხელიდან. ნელ-ნელა ყველა ხედავს რომ თანამედროვე რუსეთი, როგორც დესტრუქციული ძალა, ისე მოქმედებს უკრაინაში, ხოლო ოკუპირებულ ტერიტორიებზე შიმშილი, ავადმყოფობა და სიკვდილი ვრცელდება დიდი სისწრაფით.

– სამხედრო თვალსაზრისით ლისიჩანსკის მდგომარეობა არასაიმედოა. რუსები ქალაქს უწყვეტად ბომბავენ. ქალაქის წინააღმდეგ მუშაობს როგორც ავიაცია ისე არტილერია. სამხრეთიდან რუსული და სეპარატისტული ნაწილები ინტენსიურად უტევენ ქალაქის ირგვლივ არსებულ სამხედრო პოზიციებს. რა თქმა უნდა, უკრაინელებს კვლავ აქვთ საშუალება დაიცვან ქალაქი და იმაზე მძიმე ბრძოლა გაუმართონ რუსებს, ვიდრე სევეროდონეცკში იყო, მაგრამ თუკი ქალაქის ირგვლივ ალყის საფრთხე შეიქმნა მისი ევაკუაციის განხორციელებისა და ფრონტის ხაზის გასწორების აუცილებლობა შეიძლება დადგეს. თუმცა, როგორც იკვეთება, უკრაინელებს რუსებისათვის მაქსიმალური ზიანის მიყენება აქვთ გადაწყვეტილი, რაც ლისიჩანსკისათვის ხანგრძლივ ბრძოლასაც გულისხმობს.

– რუსებმა პოლტავას რაიონში, ქალაქ კრემენჩუკში სავაჭრო ცენტრი დაბომბეს მაშინ, როდესაც იქ ყველაზე დიდი ხალხმრავლობა იყო და შენობის შიგნით 1000 ადამიანამდე იმყოფებოდა. ტერორისტული სახელმწიფოა თანამედროვე რუსეთი.

– დიდი საარტილერიო დუელი მიმდინარეობს ხარკივის / ხარკოვის რაიონში. უკრაინელები რუსულ სამხედრო პოზიციებს ზედმიწევნით ზუსტად ანადგურებენ აი რუსების სამიზნე კი ისევ მშვიდობიანი ქალაქია. მიწაზე სამხედრო კონტროლის თვალსაზრისით არაფერი შეცვლილა.

– დღეს რუსებმა უკრაინაში სამხედრო ტექნიკის თვალსაზრისით მნიშვნელოვანი დანაკარგი განიცადეს, მათ შორისაა რამდენიმე T80 ტანკი, 10-მდე ჯავშანტრანსპორტიორი და ერთი Ka-52 შვეულმფრენი.

– მოლდოვას პრეზიდენტი მაია სანდუ კიევში ჩავიდა. პრეზიდენტმა ზელენსკიმ განაცხადა, რომ ნებისმიერი აგრესია დნესტრისპირეთის მხრიდან უკრაინელთა სერიოზულ პასუხს გამოიწვევს. როგორც არ უნდა განვითარდეს მოვლენები ამ ომმა დნესტრისპირეთის დასასრულის დასაწყისი უკვე გამოიწვია.

– აშშ აპირებს უკრაინელებს მიაწოდოს ნორვეგიული მიწა-ჰაერის ჰაერსაწინააღმდეგო NASAMS სისტემა, რაც უკრაინელებს ცის კონტროლის უფრო მაღალი ხარისხის შესაძლებლობას მისცემს.

– რუსეთმა დეფოლტი განიცადა. ანუ, მარტივად რომ ვთქვათ, რუსეთი საგარეო ვალს ვეღარ აბრუნებს და შესაბამისად ვეღარც იღებს. რუსეთი, რომელშიც ბიუჯეტის დეფიციტის პირობებში საგარეო ვალი მნიშვნელოვანი შემავსებელი იყო ამიერიდან მის გარეშე დარჩება. გარდა ამისა ეს კატასტროფული რეპუტაციული ზიანის მანიშნებელია და ნებისმიერი ბიზნესაქტივობისათვის უზარმაზარ დარტყმას გულისხმობს.

– დიდი შვიდეულის შეხვედრა შედგა, რომელზეც უკრაინის პრეზიდენტიც ჩაერთო. იქ გარკვევით ითქვა, რომ უკრაინას ცივილიზებული მსოფლიო მანამ დაუდგება გვერდით, სანამ ამის საჭიროება ექნება მას და რომ რუსეთი აუცილებლად აგებს პასუხს.