“გულზე მჯიღს რომ ირტყამს მთავრობა, ევროპას ვაჯობეთო…” – ექიმის სკანდალური ინტერვიუ

რეგიონებში მომუშავე მედიკოსებისთვის გაძვირებული მგზავრობა და შეზღუდული ტრანსპორტი ფინანსური პრობლემის ერთ-ერთი მიზეზი გახდა.

მას შემდეგ, რაც ერთ ავტომობილში ორ მგზავრზე მეტის ჩასხდომა აიკრძალა, მათი შემოსავალი გზის ფულს აღარ ჰყოფნის.

ინფორმაციის გადასამოწმებლად და ტრანსპორტირების პრობლემის გასარკვევად ორ სხვადასხვა რეგიონში, მცხეთა-მთიანეთსა და კახეთში კლინიკაში მომუშავე ექიმებს დავუკავშირდით.

მათი ვინაობის დაკონკრეტებისგან „პრაიმტაიმი“ გასაგები მიზეზების გამო თავს იკავებს.

„ამ დრომდე, ტაქსით მომსახურება თბილისიდან თელავამდე 40 ლარი ღირდა, რომელსაც 4 ადამიანი ვინაწილებდით. მას შემდეგ, რაც ერთ ავტომანქანაში ორ კაცზე მეტის ჩასხდომა აიკრძალა, რა თქმა უნდა, ძალიან გაძვირდა მგზავრობა.

ახლა, თბილისში ჩამოსვლაში ორმა ადამიანმა 60 ლარი გადავიხადეთ. ჩვენს სამსახურში ძირითადად დედაქალაქიდან და სხვა რაიონებიდან მუშაობენ.

ეს პრობლემა თითქმის მთელ სამსახურს გვეხება. ექთნებიც კი, ტაქსით დადიან. მოგეხსენებათ, მათი მწირი ხელფასის შესახებ…

შექმნილი სიტუაციის გამო, გადატვირთული სამუშაო გრაფიკი გვაქვს, შესაბამისად მისვლა-მოსვლა უფრო გაგვიხშირდა და გადასახადმაც იმატა.

გამოდის, რომ სახლში ჩვენს შვილებს საჭმელს ვერ წავუღებთ და მხოლოდ გზის ფულზე ვიმუშავებთ. ენთუზიაზმით რამდენი ოჯახი შეძლებს არსებობას რთული სათქმელია.

კლინიკები ტრანსპორტით უზრუნველყოფაზე უარს ამბობენ, რადგან ექიმების უმეტესობას საკუთარი ავტომობილი აქვს. მაგრამ როგორ მოვიქცეთ ჩვენ, ვისაც მანქანა არ გვაქვს.“ – ამბობს მედიკოსი.

„სანამ ქვეყანაში პანდემია დაიწყებოდა, დუშეთის საავადმყოფოში თანამშრომლები ტაქსით დავდიოდით, რომელშიც თითოეული 7 ლარს ვიხდიდით, ახლა ორნი 20-20 ლარს ვდებთ იმისთვის, რომ სამსახურში გამოვცხადდეთ.

რა თქმა უნდა, ეს ჩვენს ჯიბეზე დიდი დარტყმაა, ჩვენს უკან ოჯახები დგანან, წინ – პაციენტები. რომლებს ვუღალატოთ? შვილებს როგორ ვაჭამოთ.

გულზე მჯიღს რომ ირტყამს ჩვენი მთავრობა, ევროპის წამყვან ქვეყნებს ვაჯობეთო, თერაპიის კუთხით ნამდვილად ასეა, მაგრამ გადასახადების გაუქმებით რომ მივბაძოთ და მოგვცენ შესაძლებლობა, ამ რთულ მდგომარეობაში ჩვენი პროფესიული მოვალეობები მშვიდად შევასრულოთ ხომ შესაძლებელია?

საშინელებაა, როცა ექიმი დიაგნოზზე და მკურნალობის კურსზე ფიქრისას, ტვინის ერთ ხვეულში ოჯახის გაჭირვებაზე ფიქრობს.“ – აცხადებს ექიმი.

პრაიმტაიმი