„ქართული ოცნება“ დღეს ისე იქცევა, შესაძლოა, კომუნისტური პარტიის ბედი გაიზიაროს – აიკრძალოს“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ დამფუძნებელი, დავით  ჭიჭინაძე.

– ბატონო დათო გამოსავალი რა არის ამ სიტუაციიდან? ვადამდელი არჩევნები? ამ არჩევნების შედეგად კოალიციური ხელისუფლების ჩამოყალიბება,  დაძაბულობასაც განმუხტავს და ახალი არჩევნები, ევროინტერგაციის გზაზე ახალ პერსპექტივებს გააჩენს?

– ვადამდელი არჩევნები არ შეიძლება რომ ჩაატაროს „ქართულმა ოცნებამ“, რადგან კიდევ გააყალბებენ. უნდა შემუშავდეს ისეთი მექანიზმი, რომ დროებითი ტექნიკური მთავრობა უნდა ჩამოყალიბდეს, რომელშიც წარმოდგენილი უნდა იყოს ყველა პოლიტიკური ძალა, რომ მერე  არავის ჰქონდეს პრეტენზიები. ყველა ემიგრანტმა, ვინც გააქციეს ამ ქვეყნიდან, ვინც წავიდა, რადგან ამ უსამართლობის  ვეღარ გაუძლო, დაკარგა ოჯახი, დაკარგა სამშობლო, უნდა მიიღოს უცხოეთის ქვეყნებიდან  არჩევნებში მონაწილეობა. დღევანდელი ტექნოლოგიების საშუალებით, ეს შესაძლებელია. უნდა მოხდეს საარჩევნო სისტემის  სრული რეფორმირება და არჩევნების შედეგები არ უნდა იყოს დამოკიდებული ვიღაც დამთვლელებზე. ამის შემდეგ შეიძლება ჩატარდეს არჩევნები. ვადიანი იქნება თუ ვადამდელი, მთავარია, სამართლიანად ჩატარდეს. „ქართული ოცნება“ დღეს ისე იქცევა, შესაძლოა, კომუნისტური პარტიის ბედი გაიზიაროს – აიკრძლოს. ამასთან ძალიან ახლოს არიან, რადგან ვინც ძალადობს ხალხზე, ასე ამთავრებს.

– დროებითმა ტექნიკურმა მთავრობამ უნდა ჩაატაროს არჩევნებიო, ბრძანეთ და ეს თავისთავად იმას ნიშნავს, რომ „ქართულმა ოცნებამ“ ნებით უნდა დატოვოს ხელისუფლება. ამას გულისხმობთ?

– რა თქმა უნდა. როდესაც ამხელა დანაშულს სჩადიხარ ერის არჩევანის წინაშე, რა არჩევნები უნდა ჩაატარო? მოპარული არჩევნების  შემდეგ, კიდევ მოიპარავენ არჩევნებს და რა აზრის აქვს „ქართული ოცნების“ მიერ ჩატარებულ არჩევნებს. რომ მოიპარავენ მაშინ რა გზა რჩება?  ისევ პროტესტი და ისევ ქუჩა. ახლა  არაფრის დათმობა არ შეიძლება მაგათვის, ვიდრე არ იქნება მიღწეული, რომ ყველამ ირწმუნოს მომავალი არჩევნების სამართლიანობა. ეს სამართლიანობა კი  „ქართული ოცნების“ მმართველობის პირობებში ვერ მოხდება. მათ 2012 წელს დაანონსებული სამართლიანობაც კი არ აღადგინეს. ზოგადად, სამართალი არ არსებობს ქვეყანაში. სასამართლოში კლანიაო, ვინ იძახის? ისევ ჩვენი პარტნიორები და ამ კლანის მოსპობა ევროკომისიის დასკვნის ერთ-ერთი მოთხოვნაა. რა, ტყულია? არ არის კლანი სასამართლოში? არ მართავს ერთი ხელი მთელ სასამართლო სისტემას? კლანია, აბა, რა არის?!  რაც ამათ ელაპარაკებიან  უცხოელი პარტნიორები, არაფერი ესმით მაინც. რასაც ურჩევენ თუ სთხოვენ, ყველაფერს უკუღმა აკეთებენ. ამ ადამიანებმა ყველა მიმართულებით უსამართლობა შექმნეს. ისინი სამართლიან არჩევნებს ვერ ჩაატარებენ. როცა ძალადობ ხალხის არჩევანზე, არჩევანს ართმევ, მერე სამართლებრივი და პოლიტიკური მექანიზმი აღარ რჩება საკითხის მოსაგვარებლად. ხალხზე რომ ძალადობ, ხალხი სათანადოდ გიპასუხებს.