“უკრაინელები მტერს უტოვებენ პოზიციებს და “წინ წაწეული” რუსული დანაყოფები პირწმინდად უტილიზდებიან” – უკრაინის სტრატეგია და განადგურებული 58-ე არმია

უკრაინაში ომის სირთულე იმაში მდგომარეობს, რომ დაკარგულ ტექნიკას და პირად შემადგენლობას რუსები მალევე ანაცვლებენ ახალი ძალებით. მათ ჯერ კიდევ დიდი სამხედრო და ეკონომიკური რესურსი გააჩნიათ. სავარაუდოდ რუსეთი ომის ამ რეჟიმში გაგრძელებას კიდევ 10-12 თვის განმავლობაში შეძლებს. ეს არის მიზეზი იმისა, რომ უკრაინელები ომის ფორსირებას არ ჩქარობენ, იმარაგებენ შეიარაღებას და მოთმინებით ელოდებიან დროს, როდესაც ძალები საბოლოოდ გათანაბრდება. ჩემი ვარაუდით, საუკეთესო სცენარის შემთხვევაშიც კი, ეს სექტემბრამდე ვერ მოხერხდება. თუმცა რამდენიმე მნიშვნელოვანი პუნქტის დაკავების ან ამოცანის შესრულების შემთხვევაში სრულიად შესაძლებელია სტრატეგიული უპირატესობის მოპოვება.

ამას ვწერ ომის დაწყებიდან 3 თვის თავზე,. უკრაინელებმა წარმოუდგენელი მასშტაბის მისია იტვირთეს და ამ მისიის ბოლომდე მიყვანას აპირებენ. ომის შემდეგ კი ევროპა ისეთი აღარასოდეს იქნება, როგორიც გვახსოვს. უკრაინელები არ აპირებენ ფრანგებისგან ღალატის დავიწყებას, ამიტომ აქედანვე საუბრობენ აღმოსავლეთ ევროპაში ახალი ეკონომიკური და სამხედრო კოალიციის შექმნის თაობაზე, დიდი ბრიტანეთის და აშშ-ს ფრთის ქვეშ.