“პუტინი ოცნებობდა, გეოპოლიტიკა იცინოდა-ო – ომის მესამე ფაზა ახლოვდება” – ოთარ ფანცულაია

საქმე ასეა: რუსეთს უკრაინაში დიდძალი შეიარაღება შეაქვს, არ წყვეტს შეტევებს ხერსონზე და დონბასში. გარკვეული წინსვლაც აქვს, მაგრამ დიდი დანაკარგების თანხლებით. აშკარაა, რომ უმოკლეს ვადებში სტრატეგიული უპირატესობის მოპოვებას ცდილობს, რათა შემდეგ ომი მოლაპარაკებათა მაგიდასთან გადაიტანოს და იქ მისთვის სასურველ პირობებზე შეთანხმებას მიაღწიოს.

თუმცა, ნათქვამია, პუტინი ოცნებობდა, გეოპოლიტიკა იცინოდა-ო.

გეოპოლიტიკაში კი რუსეთისთვის კარგი არაფერი ხდება. ვინმე პრორუსს რომ ჰკითხოთ, ვენესუელა, ირანი და ჩინეთი რუსეთის მეგობრები არიან..

– ვენესუელა თანახმაა ზურგი აქციოს რუსეთს, თუკი მას დართავენ ნებას გახდეს ნავთობის მომწოდებელი ჩრ.ამერიკაში. მადურო უკვე შეხვდა აშშ-ს წარმომადგენლებს ამ საკითხზე შეთანხმების მისაღწევად.

– იტალიამ იჩქარა და დათანხმდა რუსეთს გაზის საფასურის რუბლში გადახდას. ამასობაში ირანი მზადაა მის მიმართ სანქციების შერბილების სანაცვლოდ ევროპას მიაწოდოს 2,8 მლნ ბარელი ნავთობი დღეში. საუბარია რუსული გაზის ირანულით სრულად ჩანაცვლებაზეც. მოლაპარაკებები უკვე მიმდინარეობს.

– ჩინელმა მაღალჩინოსანმა ფენ იუიძუნმა რუსეთი ფაქტობრივად მასხრად აიგდო. მან განაცხადა: “რუსეთს იმპერიის ამბიციები აქვს, მაგრამ რეალური ძალის დეფიციტს განიცდის”.

– ევროკავშირში გაიხსნა ტრიბუნალი რუსი ოკუპანტების მიერ სამხედრო დანაშაულების გამოსაძიებლად.

– ფინეთი და შვედეთი ნატოს წევრობას დათანხმდნენ. მათი წევრობა რუსეთისთვის იმას ნიშნავს, რომ ბალტიის ზღვა ნატოს შიდა ზღვა გახდება და იქ რუსულ გემებს აღარაფერი ესაქმებათ, ხოლო სახმელეთო საზღვარზე რუსეთს ფინეთის თანამედროვე ტექნოლოგიებით აღჭურვილი სამხედრო მანქანა შეუქმნის საფრთხეს.

– და მთავარი, რატომაც ჩქარობს რუსეთი: ლენდლიზის ფარგლებში აშშ-დან უკვე დაიძრა ყველა ლოჯისტიკური სამხედრო გემი უკრაინისკენ. ერთ-ერთი მათგანის სიგრძე 290 მეტრია და იტევს 70 ათას ტონა ტვირთს. ამგვარად ბრიტანეთის შემდგომ რუსეთის წინააღმდეგ ომში აშშ-ც ღიად ჩაერთო. ტვირთის ყველაზე მნიშვნელოვან და საჭირო ნაწილს წარმოადგენს გემების საწინააღმდეგო მაღალი სიზუსტის რაკეტები, რომლებიც 250-300 კილომეტრის სიშორიდან მოქმედებენ. ამ იარაღის ამოცანა შავ ზრვაში რუსული სამხედრო ფლოტის განადგურება და უკრაინული პორტების დებლოკირება იქნება.

– ომის მესამე ფაზა ახლოვდება. თუ ვინმეს კიდევ სჯერა მესამე ფაზაში უკრაინასთან ომში რუსეთის წარმატების, ვურჩევ ვალერიანი მოიმარაგოს. მისთვის საშინელი დრო დგება…”