“ამერიკა არავის უხსენებია, შესაბამისად, ეს არის ცარიელი სპეკულაცია” – ირაკლი კობახიძე

ქართული ოცნების თავმჯდომარემ, ირაკლი კობახიძემ ბიძინა ივანიშვილსა და Credit Suisse-ს შორის დავაზე თქვა:

“ამერიკა არავის უხსენებია, შესაბამისად, ეს არის ცარიელი სპეკულაცია. მმართველი პარტია ამერიკას არ ახსენებს და ოპოზიცია ახსენებს, ვინ აწარმოებს ანტიამერიკულ კამპანიას, თავად შეგიძლიათ განსაჯოთ“, – ამის შესახებ  საზოგადოებრივი მაუწყებელი ავრცელებს ინფორმაციას. 

ჯერ კიდევ გუშინ, 10 მაისს, ირაკლი კობახიძე ხათუნა ხოფერიას FB-პოსტზე ამბობდა, რომ მისი კითხვები ლეგიტიმურია. კერძოდ, სამთავრობო პროპაგანდისტმა ხათუნა ხოფერიამ დაწერა, რომ “ომში საქართველოს ჩართვა ნაციონალებისა და მათი უკრაინელი კოლეგების კი არა, არამედ დიდი მოთამაშის ინტერესი და მიზანია. სინამდვილეში, ნაციონალები და უკრაინელები ამ დიდ თამაშში მხოლოდ მეორეხარისხოვანი როლის შემსრულებლები არიან”. ხათუნა ხოფერიას აზრით, “შვეიცარიული ბანკის მიერ ტრანზაქციების შეჩერების და ამ მასშტაბის კოორდინაციის ორგანიზების რესურსი მხოლოდ ერთ დიდ მოთამაშეს – ამერიკას აქვს” და “ივანიშვილთან ევტუშენკოვსაც მათ დაარეკინეს”.