რუსეთი აპირებს ტაქსის მძღოლებსა და სატრანსპორტო სერვისების პროვაიდერებს მოსთხოვოს ФСБ-ს [ფედერალური უსაფრთხოების სამსახური] პირდაპირ რეჟიმში გაუზიარონ ინფორმაცია მგზავრებისა და მარშრუტების შესახებ. შესაბამისი კანონპროექტი რუსეთის ტრანსპორტის სამინისტროს ეკუთვნის, რომლის თანახმადაც უსაფრთხოების სამსახურს ექნება უფლება – მიიღოს, დაამუშაოს და შეინახოს ინფორმაცია მგზავრებისა და შეკვეთების შესახებ.
BMG დაინტერესდა არის თუ არა ახალი კანონპროექტი საფრთხის შემცველი ქართველი მომხმარებლებისთვისაც, რომლებიც რუსულ “იანდექსის” ტაქსის აპლიკაციას საქართველოში იყენებენ. BDO-ს კიბერ და ინფორმაციული უსაფრთხოების განყოფილების ხელმძღვანელს ანზორ მეხრიშვილის თქმით, ეს საფრთხე ამ კანონის მიღებამდეც არსებობდა, რადგან რუსული კომპანია მონაცემებს რუსული კანონმდებლობის შესაბამისად ამუშავებს.
“როცა საშუალება გვქონდა ყოველთვის ვამბობდით, რომ იანდექსის აპლიკაციის გამოყენება ნაკლები ყოფილიყო. რეალურად ამ სერვისს იყენებენ, რადგან უფრო იაფია, თუმცა არად აგდებენ იმას, რომ მათი პერსონალური მონაცემები: გადაადგილების მარშრუტი და ა.შ შესაძლოა რუსეთის მიერ დამუშავდეს”,-ამბობს მეხრიშვილი.
მისი განმარტებითვე, მომხმარებლის ისტორია გადაადგილებაზე, გამოძახებებზე და ა.შ აპლიკაციაში არ ინახება და თავს იყრის მონაცემთა ბაზაში. კერძოდ, როცა მომხმარებელი სისტემაში რეგისტრირდება მონაცემთა ბაზაში კონკრეტულ ადამიანზე “ჩანაწერი კეთდება”, რაც მოიცავს აპლიკაციაში მოთხოვნილ სავალდებულოდ შესაყვან პერსონალურ მონაცემებს, ასევე მომხმარებლის გადაადგილების ისტორიას და სხვა.
“ასეთ ინფორმაციას ამუშავებს ნებისმიერი აპლიკაცია, თუმცა, როცა საუბარი გვაქვს სანდო აპლიკაციებზე, რომელთა მფლობელებიც მაგალითად ევროკავშირის ტერიტორიაზე ოპერირებენ, ისინი მონაცემთა შენახვის წესებს იცავენ. რუსული აპლიკაციების გამოყენება სანდო არ არის, რადგან კანონმდებლობა მათ ავალდებულებს “საჭიროების შემთხვევაში” ეს ინფორმაცია გადასცენ. განსხვავებით აშშ-სგან, სადაც APPLE-სა და FBI-ის დავა ჰქონდათ, გაეცათ თუ არა ინფორმაცია კონკრეტულ ტერორისტზე”,-ამბობს BDO-ს წარმომადგენელი.
ამის გათვალისწინებით, ანზორ მეხრიშვილი მოსახლეობას ურჩევს, არ გამოიყენონ ან მაქსიმალურად შეამცირონ რუსული აპლიკაციების გამოყენება.
“აპლიკაციამ მეილის მისამართიც რომ მოგთხოვოს, ან ბარათის გადახდის შემთხვევაში – საბარათე ინფორმაცია, ამ მეილის მითითების შემდეგ გარკვეულმა ჯგუფმა/სამსახურმა უკვე იცის კონკრეტული ადამიანი რომელი ელექტრონულ ფოსტას იყენებს. შესაბამისად, ფიშინგი იქნება თუ ტელეფონზე გაგზავნილი ყალბი შეტყობინება ან/და დეზინფორმაცია, ისინი ამ მისამართებს იყენებენ.
ჩვენ გვაქვს კანონი “პერსონალური მონაცემების დაცვის შესახებ”, რომლის საფუძველზეც, ჩემი აზრით, “ინადექს ტაქსის” ადგილობრივი წარმომადგენლობის ინსპექტირება უნდა მოხდეს. ასევე ტექნიკურად უნდა შეისწავლონ, როგორ მუშავდება მონაცემები ანუ როგორ ხდება საქართველოს მოქალაქეების პერსონალური მონაცემების დამუშავება და როგორ არის ის დაცული აქაური წარმომადგენლობის მიერ”,-ამბობს მეხრიშვილი.
კომენტარები