“მთავარი არხის” ინფორმაციით, ბათუმის ყველაზე დიდმა სავაჭრო ცენტრმა, რუსი მოქალაქეებისთვის გადახდის სისტემაში რუსული Мир დაამატა. საერთაშორისო პარტნიორების მკაცრი გზავნილების და გაფრთხილების მიუხედავად, ტრანზაქციის რუსული სისტემა საქართველოში ჩამოსული, ოკუპანტი ქვეყნის მოქალაქეებს საშუალებას მისცემს საბანკო ბარათები გამოიყენონ.
რუსული ბარათის გამოყენებას ცენტრის ადმინისტრაციაში ადასტურებენ.
“ჩვენ გვექნება პროგრამა, რომლითაც შეძლებენ რუსეთის მოქალაქეები მხოლოდ Мир- ს ბარათით გადახდას, ვამზადებთ, პროგრამას რომ შეძლონ გადახდა.” ამბობს, სავაჭრო ცენტრის წარმომადგენელი.
ცნობისთვის, სავაჭრო ცენტრი ცნობილი ბიზნესმენის, გალიფ ოზთურქის საკუთრებაა.
ეროვნული ბანკის 9 მარტის განცხადებით, საქართველოში მოქმედი კომერციული ბანკები და საბარათე საპროცესინგო სისტემები, გადახდების სისტემების კომპანია Мир-თან არ თანამშრომლობენ.
განცხადებაში აღნიშნულია, ამ სისტემით ოპერაციები სრულად ხორციელდება რუსულ სისტემაში და მას საქართველოს საფინანსო სისტემასთან შეხება არ აქვს.
„ბანკის ინფორმაციით, საგადახდო სისტემების კომპანია Мир-ი თანამშრომლობს აფხაზეთის დე ფაქტო რესპუბლიკასთან, რაც ბანკის შეფასებით, შესაძლოა არღვევდეს ოკუპირებული ტერიტორიების შესახებ კანონს.
რაც შეეხება ქართული კომპანიის თანამშრომლობის საკითხს, აღნიშნულის შეფასება სცილდება ეროვნული ბანკის კომპეტენციას.
საქართველოს ეროვნული ბანკი ყოველთვის მოქმედებდა და მოქმედებს საერთაშორისო რეზოლუციებით განსაზღვრულ სტანდარტებთან სრულ შესაბამისობაში. შეგახსენებთ, რომ სანქციებით გათვალისწინებული მოთხოვნების შესრულების ვალდებულების შესახებ მითითება ეროვნულმა ბანკმა საქართველოს საფინანსო სექტორის წარმომადგენლებს უკვე მისცა“ – წერდა ეროვნული ბანკი განცხადებაში.
კომენტარები