გერმანიის ეკონომიკის მინისტრი და ვიცე-კანცლერი, რობერტ ჰაბეკი ამბობს, რომ 2022 წლის შემოდგომისთვის გერმანია რუსეთისგან ქვანახშირის მიღებას მთლიანად შეწყვეტს, წლის ბოლომდე კი რუსული ნავთობისგან თითქმის მთლიანად დამოუკიდებელი გახდება. ამის შესახებ ჰაბერკმა გერმანულ გამოცემასთან ისაუბრა.
მისი თქმით, გერმანიისთვის რუსულ გაზზე უარის თქმა უფრო რთული იქნება, რადგან ქვეყანას არ აქვს თხევადი გაზის იმპორტის სხვა შესაძლებლობები, თუმცა გერმანია შესაბამისი ტერმინალის აშენებას გეგმავს.
ამასთან, როგორც ვიცე-კანცლერმა აღნიშნა, ის მალე გაემგზავრება სხვა ქვეყნებში, სადაც თხევად ბუნებრივ გაზსა და წყალბადს აწარმოებენ.
ჰაბეკმა ინტერვიუში ასევე თქვა, რომ გერმანიის ხელისუფლების გეგმა რუსეთისგან ენერგორესურსების იმპორტის სრულად შეჩერებაა. მისივე თქმით, ყველასი ესმის, ვინც რუსეთისთვის ემბარგოს დაწესებისკენ მოუწოდებს, თუმცა ამგვარი შეზღუდვები გერმანიის ეკონომიკასა და მოსახლეობას მეტ ზიანს მოუტანს, მთავრობა კი მთელ ქვეყანაზეა პასუხისმგებელი.
“იმპორტის მყისიერი აკრძალვა გამოიწვევს მომავალი ზამთრის მარაგების შემცირებას, ეკონომიკურ რეცესიასა და მაღალ ინფლაციას. ათასობით ადამიანი დაკარგავს სამსახურს, გათბობასა და ელექტროენერგიას.
სანქციები ისეთი უნდა იყოს, რომ ჩვენ შევძლოთ გადარჩენა. ჩვენ ვმუშაობთ ყოველდღე, რომ შევამციროთ დამოკიდებულება რუსულ ნავთობზე, ნახშირსა და გაზზე”,- თქვა მან.
„მთავარი არხი“
კომენტარები