„ეს ადამიანი არის უკრაინის მოქალაქე და როგორც უკრაინის მოქალაქე, პირველ რიგში, მივმართავ უკრაინის ხელისუფლებას, რომ გაიყვანონ თავისი მოქალაქე და მიხედონ“, – ამის შესახებ მესამე პრეზიდენტის მიხეილ სააკაშვილის დედამ გიული ალასანიამ სააკაშვილზე საუბრისას ტელეკომპანია „პირველის“ ეთერში განაცხადა.
გიული ალასანიას თქმით, სააკაშვილის მიერ შიმშილობის მეორედ დაწყება ძალიან სახიფათოა.
ალასანია ამბობს, რომ საპატიმროში საღამოს 6 საათიდან ექიმი არ იმყოფება და შესაბამისად, მას ყურადღება არ ექცევა.
„ყველა ექიმი გვაფრთხილებდა და მაგალითად, ნიკა ყიფშიძე იმ აზრზე იყო, რომ 10 დღეც შეიძლება ვერ გაძლოს. ეს ძალიან სახიფათო წამოწყებაა, მაგრამ სხვა გამოსავალი არ აქვს. ყველაფერი მოუხსნეს, ყველაფერი აუკრძალეს. არაფრის უფლება არ აქვს.
სასამართლოზე გავიგე, რომ 18:00 საათიდან ექიმი საერთოდ აღარ არის იმ დაწესებულებაში, ყოველ წუთს შეიძლება ექიმის დახმარება დასჭირდეს, შესაბამისად არავითარი დახმარების იმედი არ უნდა გვქონდეს. ეჭვებიც გიჩნდება ამ დროს ადამიანს, ექიმიც არ არის, შეიძლება რამე ავნონ, ყველაფერი ხდება, რა ვიცი…
ყველაფერს ვგულისხმობ, ისეთ დაწესებულებაში არის, სანატორიუმში ხომ არ არის? აუცილებელია მისი გაყვანა საზღვარგარეთ სამკურნალოდ და განცხადება გააკეთა, რომ მისი დაავადება აქ ვერ განიკურნება.
ჩემი აზრი არის ასეთი, ბოლოს და ბოლოს ეს ადამიანი არის უკრაინის მოქალაქე და როგორც უკრაინის მოქალაქე, პირველ რიგში მივმართავ უკრაინის ხელისუფლებას, რომ გაიყვანონ თავისი მოქალაქე და მიხედონ“, – აცხადებს გიული ალასანია.
კომენტარები