“იმედია, პირველი მარტიდან გაზაფხულდება, იქნება ბევრი სიყვარული” – პერსონალურ მონაცემთა დაცვის სამსახურის უფროსის კანდიდატი

პარლამენტში პერსონალურ მონაცემთა დაცვის სამსახურის უფროსის თანამდებობის ერთ-ერთ კანდიდატთან, თამარ ალფაიძესთან გასაუბრება დასრულდა. 

ადამიანის უფლებათა დაცვის კომიტეტზე კანდიდატს ოპოზიციონერმა დეპუტატებმა ჰკითხეს, როგორ აფასებს პროცესს, რის შედეგადაც დაჩქარებული წესით გაიმიჯნა სახელმწიფო ინსპექტორის სამსახურის ფუნქციები, რაზეც კანდიდატმა ასე უპასუხა:

“ეს არის ინსტიტუციური პროცესი ჩემთვის და არა პერსონიფიცირებული. ძალიან ვწუხვარ, რომ ასე მოხდა, მაგრამ ალბათ მოხდა იმიტომ, რომ ინსტიტუციურად საჭირო იყო ამ ორი რგოლის ერთმანეთისგან განცალკევება, ასევე იყო თავიდანვე მოაზრებული, მე თვითონ ვსვამ კითხვას – რატომ შეერთდა თავის დროზე?
არ ვუყურებ ამ საკითხს ასე მტკივნეულად… იმედი მაქვს, რომ საკონსტიტუციო სასამართლო მიიღებს თავის გადაწყვეტილებას, თუმცა, იმის იმედი უფრო მაქვს, რომ ინსტიტუციურ საკითხს უფრო დავალაგებთ მომავალში და გაზაფხულდება პირველი მარტიდან, იმედი მაქვს, რომ პირველი მარტიდან გაზაფხულდება მთელს საქართველოში, აღარ იქნება სიძულვილის ენა, იქნება ბევრი სიყვარული, ჩვენ ქართველები ვართ…

მე არ აპოლიტიკური ადამიანი, სტუდენტებს თავისუფლებას ვასწავლი, რაღაცეების არ შემეშინა…”