პოლიტიკური და სამართლებრივი აბსურდი – ასე აფასებს ოპოზიციონერი პოლიტიკოსი გიგი უგულავა ძიუდოისტის ცემის საქმეზე პროცესების განახლებას.
უგულავა “ტვ პირველთან” ამბობს, რომ როგორც კი საქართველოში პოლიტიკური ცხოვრება ცოცხლდება, ხელისუფლება პოლიტიკურ საქმეებს აცოცხლებს.
რაც შეეხება დღევანდელ სასამართლო პროცესს, ხელისუფლების ოპონენტი აღნიშნავს, რომ მოწმეს მოუწევს დაამტკიცოს, “როგორ ცემა მან ჩემპიონი”.
პოლიტიკური ცხოვრება ცოცხლდება, და ასეთი საქმეები გაგრძელდება. ეს საქმე პოლიტიკური და სამართლებრივი აბსურდია და ამ რეჟიმის ცინიზმს კარგად წარმოაჩენს. მე და გოკა გაბაშვილს ყველაზე დაცულ ადგილზე თავს დაგვესხნენ, მერე აქით დამაბრალეს, რომ ვცემე და აგერ სასამართლოზე დავდივარ. პროკურატურაც თუ ირწმუნება, სასამართლოც თუ ამას იძახის, გავაშელიშვილის მაგას წერს, ბოლოში მეც დავიჯერებ, რომ ვცემე, ეს რა თქმა უნდა ხუმრობით, მეტი რა ვქნა, დავდივარ და ამ აბსურდში ვმონაწილეობ.
სიმართლე და ტრაგიზმი ამ ისტორიის ის არის, რომ როდესაც შენ სამართალდამცავ სისტემას ერთხელ მწვანე შუქს აუნთებ, რომ უკანონობა ჩაიდინოს, მერე აუცილებლად მოხდება ის, რაც მოხდა თბილისის მეტროში, როცა შშმ პირი პოლიციელმა სცემა”- განაცხადა პოლიტიკოსმა.
თბილისის საქალაქო სასამართლოში ოპოზიციონერი ლიდერის, გიგი უგულავას საქმეზე სასამართლო პროცესი მიმდინარეობს. სხდომას ესწრება უგულავა.
დღევანდელ პროცესზე ბრალდების მხარის 4 მოწმე დაიკითხება. მათ შორის არიან, მესაზღვრე პატრული და გამომძიებელი.
ძიუდოისტ ბადრი გავაშელიშვილის ცემის საქმეზე სასამართლო პროცესები თვეების განმავლობაშ შეჩერებულიყო, თუმცა ისევ განახლდა. თავად უგულავა ფაქტს მისდამი პოლიტიკური დევნით ხსნის.
ინციდენტი 2019 წლის 11 დეკემბერს თბილისის საერთაშორისო აეროპორტში მოხდა, როცა ოპოზიციის მტკიცებით, გიგი უგულავასა და გოკა გაბაშვილს, აეროპორტის საპასპორტო კონტროლის ზონაში თავს ორი პირი სპორტსმენი – საბა (ბადრი) გავაშელიშვილი და დავით პარკაძე დაესხა.
შინაგან საქმეთა სამინისტრომ გამოძიება 126-ე, ძალადობის, მუხლით დაიწყო, თუმცა ნაცვლად გავაშელიშვილისა, უწყებამ ბრალი უგულავას წარუდგინა. საქმეში დევს ძიუდოისტ გავაშელიშვილის ჩვენება, რომლის მიხედვითაც მას უგულავამ სცემა.
კომენტარები