საქართველოში ყოველი მეორე მოქალაქე ამბობს, რომ ქვეყანაში ამჟამად დემოკრატია არ არის – კვლევა ეროვნულ-დემოკრატიული ინსტიტუტმა (NDI) რამდენიმე წუთის წინ გამოაქვეყნა:
კითხვაზე, არის თუ არა ამჟამად საქართველოში დემოკრატია პასუხები ასე გადანაწილდა:
არა – 50% , კი – 39% , არ ვიცი – 11%.
NDI-ის კვლევის თანახმად, ქართული ოცნების მხარდამჭერთა 70% ამბობს, რომ ქვეყანაში დემოკრატიაა, 22% პასუხობს, რომ არ არის.
ოპოზიციის მხარდამჭერთა 21% ფიქრობს, რომ საქართველოში დემოკრატია არის, 74% კი ასე არ მიიჩნევს. მათ შორის, ვინც პარტია არ დაასახელა, 55% ფიქრობს, რომ დემოკრატია ქვეყანაში არ არის, 31% კი – არა.
NDI-ის კვლევით, მოსახლეობის 49% აცხადებს, რომ დემოკრატიულ ქვეყანაში ცხოვრება ძალიან მნიშნელოვანია, 43%-ისთვის მნიშვნელოვანია, 4%-ისთვის უმნიშვნელო, 1%-ისთვის სრულიად უმნიშვნელო, ხოლო 3%-ს კითხვაზე პასუხი არ აქვს.
34% ფიქრობს, რომ ქართული დემოკრატია მეზობელი ქვეყნებისთვის ადრე იყო მისაბაძი მაგალითი, თუმცა ბოლო წლებში აღარ არის, 25%-ის აზრით, არსდროს ყოფილა, 23% ფიქრობს, რომ არის, 18%-მა უპასუხა, რომ არ იცის, 1% პასუხზე უარს ამბობს.
კვლევა ჩატარებულია NDI-ის დაკვეთით CRRC საქართველოს მიერ. საველე სამუშაოები 2021 წლის 7-13 დეკემბერს ჩატარდა. სატელეფონო ინტერვიუს მეთოდი ჩატარდა 2 099 დასრულებული ინტერვიუ. საშუალო ცდომილების ზღვარი არის +/- 1,3%. რესპონდენტები მარტივი შემთხვევითი შერჩევის გზით – შემთხვევით ნომერზე დარეკვის მეთოდით შეირჩნენ. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის.
კომენტარები