„ნაციონალური მოძრაობის“ წევრი გიორგი ბარამიძე მიიჩნევს, რომ არსებული ხელისუფლების პირობებში უკრაინის მიმართ სრულფასოვანი და ხარისხიანი რეზოლუციის მიღება შეუძლებელია და ეს საწყისშივე ცხადი იყო. ამის შესახებ ბარამიძე სოციალურ ქსელში წერს.
„ნუთუ ვინმე სერიოზულად ფიქრობს, რომ საქართველოში პუტინის გეგმის შემსრულებელი, კოლაბორაციონისტი, მოღალატე გავრილოვები უკრაინაში მოსალოდნელ რუსული აგრესიის მორიგ, ფართთო მასშტაბიან აგრესიასთან დაკავშირებით, სრულფასოვან და ხარისხიან რეზოლუციას მიიღებდნენ? სადაც (როგორც მინიმუმ რაც უნდა იყოს ქვემოთ დავწერ), ის პუნქტებიც იქნება, რაც (ნორმალურ ვითარებაში) საქართველოს პარლამენტის რეზოლუციაში აუცილებლად უნდა იყოს, ჩაწერენ და მათთან ერთად ასეთი პრინციპული სახელმწიფოებრივი პოზიციის დაფიქსირება შესაძლებელია?”- წერს გიორგი ბარამიძე და მისი აზრით რეზოლუციაში აუცილებლად დასაფიქსირებელ რამდენიმე პუნქტს აცნობს საზოგადოებას.
„1.საქართველოს სტრატეგიული პარტნიორის, უკრაინის სუვერენიტეტისა და ტერიტორიული მთლიანობის ურყევი მხარდაჭერა.
2.რუსეთის მიერ მიმდინარე და მოსალოდნელი ფართომასშტაბიანი ინტერვენციის დაგმობა.
3. ყირიმის ანექსიის დაგმობა.
4. დონბასის რეგიონის ოკუპაციის დაგმობა.
5. უკრაინაში კანონიერი ხელისუფლების დამხობის მცდელობის დაგმობა.
6 საქართველოს ტერიტორიების ოკუპაციის დაგმობა და ხაზგასმა, რომ უკრაინასა და საქართველოში, ეს მოვლენები რუსეთის ნეოიმპერიული მისწრაფებების რეალიზაციის ნაწილია.
7. რუსეთის მიერ, უკრაინისა და საქართველოს, ისევე როგორც სხვა ქვეყნების საშინაო საქმეებში ჩარევის დაგმობა.
8. ნატოს ღია კარის პოლიტიკის მხარდაჭერა
9. საქართველოსა და უკრაინის ნატოში გაწევრიანების მხარდაჭერა
10. რუსეთისადმი მოწოდება, საქართველოსთან დადებული 12 აგვისტოს და სხვა სუვერენულ სახელმწიფოებთან საერთაშორისო ხელშეკრულებებისა და ვალდებულებების შესრულების აუცილებლობაზე.
11. მოწოდება დასავლეთის სახელმწიფოების მიმართ, დროული და ქმედითი სამხედრო, ტექნიკური, ფინანსური და ჰუმანიტარული (საკმარი და არა სიმბოლური ხასიათის) დახმარება აღმოუჩინონ უკრაინას.
12. ქართველი ხალხის გულწრფელი სურვილი და სწრაფვა, რუსეთის ფედერაციასთან კეთილმეზობლური, მშვიდობიანი და ურთიერთპატივისცემით განმსჭვალული ურთიერთობების აგება, ერთმანეთის სუვერენიტეტის, ტერიტორიული მთლიანობისა და არჩევანის თავისუფლების პატივისცემის საფუძველზე,”- ასე გამოიყურება რეზოლუციის ბარამიძისეული ვარიანტი.
გიორგი ბარამიძე აღნიშნავს, რომ რუსეთმა საქართველოში საკუთარ მიზანს უკვე მიაღწია.
„რუსეთმა იმას უკვე (დროებით, მაგრამ ფაქტია) მიაღწია საქართველოში, რასაც ახლა უკრაინასთან მიმართებაში ცდილობს, ანუ ადგილზე, მთავრობაში, ჰყავდეს ის რეჟიმი, რომელიც მის იმპერიული ინტერესების გატარებას აწყობს. სოლიდარობა ჩვენს ძმებს უკრაინელებს!“- წერს ბარამიძე.
კომენტარები