როგორც ჩანს, მიიღეს მითითება და შეთანხმებული ტექსტი შეიცვალა – ხათუნა სამნიძე უკრაინის მხარდამჭერი რეზოლუციის შესახებ

უკრაინის მხარდამჭერი რეზოლუციის ტექსტზე ოპოზიცია და ქართული ოცნება ვერ შეთანხმდა. ხელისუფლების ოპონენტები ამტკიცებენ, რომ მმართველი უმრავლესობის შეთავაზებული ვარიანტიდან ამოღებულია ფრაზა რუსეთის სამხედრო აგრესია და ოკუპანტი ქვეყნის ძალადობრივ ქმედებებზე შეფასება გაკეთებული საერთოდ არაა. როგორც ჩანს,  მიიღეს მითითება და დილით შეთანხმებული ტექსტი შეიცვალა, – ამის შესახებ  “რეფორმების ჯგუფის” ხელმძღვანელმა ხათუნა სამნიძემ  უკრაინის მხარდამჭერი რეზოლუციის შესახებ განაცხადა.

“როგორც იცით,  მე საკმაოდ ოპტიმისტურად ვიყავი განწყობილი, იქედან გამომდინარე, დილით რა ტექსტიც დაგვახვედრა “ქართულმა ოცნებამ”,  წარმოადგინა საკუთარი ვერსია, იქ გათვალისწინებული იყო ოპოზიციის მოთხოვნები და კომენტარები.  ვთქვი, თუ რაიმე რადიკალურად არ შეიცვალა, ჩვენ შეთანხმებას შევძლებთ, რადგან პრინციპული საკითხები შეთანხმებულია. როგორც ჩანს, სწორედ რადიკალურად შეიცვალა, როგორც ახასიათებს “ქართულ ოცნებას”, რომელიც საკუთარი გადაწყვეტილებებით ვერ დგამს ნაბიჯებს, როგორც ჩანს,  მიიღეს მითითება.  სხვანაირად ამას ვერ ვხსნი, რადგან კონკრეტული არგუმენტები “ქართული ოცნებიდან” არ მომისმენია და ის ტექსტი, რომელიც დილით იყო შეთანხმებული, შეიცვალა.

ამ რეზოლუციის თანაავტორი “რესპუბლიკური პარტია“ არ იქნება, როგორც მოიქცევა დანარჩენი ოპოზიცია, ამაზე მოვილაპარაკებთ. “ოცნება” ამ პროექტს დააინიცირებს საკუთარი ინიციატივით”, – განაცხადა ხათუნა სამნიძემ.