სავარაუდო კორუფციული გარიგებები ბათუმში – ზღვისპირა ქალაქში “ქართული ოცნების” დეპუტატის მფლობელობაში არსებული კომპანიები მერიის ტენდერებს უკონკურენტოდ იგებენ. ამასთან დაკავშირებით ბათუმის საკრებულოში “ნაციონალური მოძრაობის” წევრმა, რევაზ ხარაზმა საგანგებო ბრიფინგი გამართა.
როგორც მან აღნიშნა, საკრებულოს დეპუტატის, ლევან დოლიძის ორ კომპანიას – შპს “ბონდს” და შპს “მონოლითს”, 2021 წლიდან დღემდე, ქალაქის ბიუჯეტიდან 25 მილიონ ლარზე მეტი აქვს მიღებული.
რევაზ ხარაზი ამ საკითხზე საკრებულოს სხდომის მოწვევას ითხოვს. გარდა ამისა, ის საგამოძიებო უწყებებს მოუწოდებს საქმეზე შესაბამისი რეაგირება მოახდინონ.
“მინდა გითხრათ, რომ უფუნქციო ბათუმის საკრებულოში, გვყავს წევრები, რომლებიც ბათუმელების ხარჯზე ამ წლების განმავლობაში ხდებიან მილიონერები. მინდა გავამახვილო ყურადღება იმ ნაწილზე, რასაც ინფრასტრუქტურა ჰქვია. არის ასეთი ორი კომპანია – შპს ბონდი და შპს მონოლითი, რომელიც ეკუთნის ბათუმის საკრებულოს წევრს, ლევან დოლიძეს. სწორედ ამ ორ კომპანიაზე 2021 წლიდან დღეის მდგომარეობით 25 მილიონ ლარზე მეტი არის ბათუმის ბიუჯეტიდან გადახდილი.
ეს იმას ნიშნავს, რომ ამ გაღატაკებულ ქალაქში, უფუნქციო საკრებულოს ჰყავს წევრები, რომლებიც ოფიციალურად ბათუმელების ხარჯზე არიან მილიონერები. ამიტომ არ დადის ქართული ოცნება დღეს საკრებულოში და იცილებს პასუხისმგებლობას ხალხთან ურთიერთობაზე. ხშირად ერთპიროვნულად იღებს ტენდერებს ამ ტენდერების მიღებას აგრძელებს 2022 წელსაც. გრძელდება კორუფციული გზით ხარჯვა ბათუმის ბიუჯეტის”, – თქვა რევაზ ხარაზმა.
კომენტარები