გაერთიანებული სამეფოს საგარეო საქმეთა ოფისმა განაცხადა, რომ ფლობს ინფორმაციას იმის შესახებ, რომ რუსეთის მთავრობა გეგმავს „კიევში პრორუსი ლიდერის დანიშვნას, რადგან განიხილავს უკრაინაში შეჭრას და ოკუპაციას“. ამის შესახებ CNN წერს.
“უკრაინელი ყოფილი დეპუტატი ევგენ მურაევი განიხილება პოტენციურ კანდიდატად”, – განაცხადეს ბრიტანეთის საგარეო საქმეთა, თანამეგობრობისა და განვითარების ოფისში. მურაევმა განუცხადა CNN-ს, რომ “კომენტარს ვერ გააკეთებს” ბრალდებებთან დაკავშირებით, რადგან ის უკრაინის მოქალაქეა და ჯერ კიდევ რუსული სანქციების საფრთხის წინაშე დგას.
განცხადებაში ნათქვამია – „ჩვენ გვაქვს ინფორმაცია, რომ რუსეთის სადაზვერვო სამსახურები ინარჩუნებენ კავშირებს უამრავ უკრაინელ ყოფილ პოლიტიკოსთან“, მათ შორის სერხი არბუზოვთან – უკრაინის პირველ ვიცე-პრემიერი 2012-დან 2014 წლამდე და პრემიერ-მინისტრის მოვალეობის შემსრულებელი 2014 წელს; ანდრეი კლუევთან – პრემიერ-მინისტრის პირველი მოადგილე 2010-დან 2012 წლამდე და უკრაინის ყოფილი პრეზიდენტის იანუკოვიჩის შტაბის უფროსი; ვლადიმერ სივკოვიჩთან – უკრაინის ეროვნული უსაფრთხოებისა და თავდაცვის საბჭოს (RNBO) ხელმძღვანელის ყოფილი მოადგილე; მიკოლა აზაროვითან – უკრაინის პრემიერ მინისტრი 2010-2014 წლებში.
“ზოგიერთ მათგანს აქვს კონტაქტი რუსეთის დაზვერვის ოფიცრებთან, რომლებიც ამჟამად არიან ჩართული უკრაინაზე თავდასხმის დაგეგმვაში”, – ნათქვამია ბრიტანეთის საგარეო საქმეთა სამინისტროს განცხადებაში. რუსეთმა უარყო ბრალდებები იმასთან დაკავშირებით, რომ აპირებს უკრაინაზე თავდასხმას.
რუსეთის საგარეო საქმეთა სამინისტრომ მოუწოდა გაერთიანებული სამეფოს საგარეო საქმეთა სამინისტროს, „შეწყვიტოს პროვოკაციებში მონაწილეობა“, იტყობინება TASS.
“ბრიტანეთის საგარეო საქმეთა სამინისტროს მიერ გავრცელებული დეზინფორმაცია კიდევ ერთი მტკიცებულებაა იმისა, რომ ეს არის ნატოს ქვეყნები, ანგლო-საქსების ხელმძღვანელობით, რომლებიც ამძაფრებენ დაძაბულობას უკრაინის გარშემო. მოვუწოდებთ ბრიტანეთის საგარეო საქმეთა სამინისტროს, შეწყვიტოს პროვოკაციული ქმედებები, შეწყვიტოს სისულელეების გავრცელება და ყურადღება გაამახვილოს თათარ-მონღოლური ბატონობის ისტორიის შესწავლაზე“, – განუცხადა TASS-ს რუსეთის საგარეო საქმეთა სამინისტროს წარმომადგენელმა.
CNN-მა მიმართა დიდი ბრიტანეთის საგარეო საქმეთა ოფისს დამატებითი კომენტარისთვის, ასევე დამადასტურებელი მტკიცებულებების მისაღებად, მაგრამ განუცხადეს, რომ მეტ კომენტარს არ გააკეთებენ.
„ინფორმაცია, რომელიც დღეს გამოქვეყნდა, ნათელს ჰფენს რუსეთის მოქმედების მასშტაბებს უკრაინის დასამხობად და წარმოადგენს კრემლის აზროვნებას“, – თქვა დიდი ბრიტანეთის საგარეო საქმეთა მინისტრმა ლიზ ტრუსმა განცხადებაში.
„რუსეთმა უნდა მოახდინოს დეესკალაცია, შეწყვიტოს აგრესიისა და დეზინფორმაციის კამპანია და დიპლომატიის გზაზე დადგეს. როგორც დიდმა ბრიტანეთმა და ჩვენმა პარტნიორებმა არაერთხელ თქვეს, რუსეთის ნებისმიერი სამხედრო შეჭრა უკრაინაში იქნება უზარმაზარი სტრატეგიული შეცდომა,
ჩვენ არ მოვითმენთ კრემლის შეთქმულებას უკრაინაში პრორუსული ხელმძღვანელობის დაყენების მიზნით“. – ამბობს ტრუსი.
კომენტარები