ბიტკოინმა დაკარგა თავისი ღირებულების თითქმის ნახევარი. კრიპტოვალუტის ღირებულება აგრძელებს ვარდნას, რადგან ეკონომიკა ცდილობს, შეაჩეროს მისი მზარდი პოპულარობა. ამის შესახებ CNN წერს.
ეს არ ეხება მხოლოდ ბიტკოინს, ზოგადად, კრიპტოვალუტებს წელს სავალალო დასაწყისი ჰქონდათ. CoinDesk-ის თანახმად, ბიტკოინის ღირებულება ბოლო 24 საათის განმავლობაში 8%-ით დაეცა და დილის 9:30 საათისთვის 35,479 დოლარი შეადგინა. წლის დასაწყისიდან მოყოლებული, მსოფლიოში ყველაზე ძვირადღირებული კრიპტოვალუტის ღირებულება 20%-ით დაეცა. ნოემბერში ის რეკორდულ მაჩვენებელზე, $68,990-ზე იყო.
Ethereum, მსოფლიოში მეორე ყველაზე ძვირადღირებული კრიპტოვალუტის ღირებულება, ბოლო 24 საათის განმავლობაში 12%-ზე მეტით დაეცა და CoinDesk-ის თანახმად, დაახლოებით 2 400 დოლარი შეადგინა. ეს არის თითქმის 30%-იანი ვარდნა ახალი წლიდან დღემდე.
Reuters წერს, რომ რუსეთის ცენტრალურმა ბანკმა სახელმწიფოს შესთავაზა, აკრძალოს კრიპტოვალუტის გამოყენება და მაინინგი. რუსეთი მსოფლიოში ერთ-ერთი უმსხვილესი კრიპტო-მაინინგ ქვეყანაა, მაგრამ მისმა ცენტრალურმა ბანკმა განაცხადა, რომ ციფრულმა ვალუტამ შეიძლება საფრთხე შეუქმნას ქვეყნის ფინანსურ სტაბილურობას.
ჩინეთმა კი დაიწყო კრიპტოვალუტების სრულმასშტაბიანი შეზღუდვა, აკრძალა როგორც ვაჭრობა, ასევე მაინინგი.
ნოემბერში ინდოეთმა განაცხადა, რომ ემზადება კანონპროექტისთვის, რომელიც დაარეგულირებს ციფრულ ვალუტებს, თუმცა ამ წინადადების შესახებ ჯერ კიდევ ბევრი რამ უცნობია. ამ კვირის დასაწყისში ინდოეთის პრემიერ-მინისტრმა ნარენდრა მოდიმ თქვა, რომ გლობალური თანამშრომლობაა საჭირო კრიტოვალუტით გამოწვეული პრობლემების მოსაგვარებლად.
თუმცა, ყველა არ არის პესიმისტურად განწყობილი, Goldman Sachs-მა განაცხადა, რომ ბიტკოინის ღირებულებამ შეიძლება 100 000 დოლარზე მეტს მიაღწიოს მომდევნო ხუთი წლის განმავლობაში.
კომენტარები