შევსებული პედიატრიული საწოლფონდი და კრიტიკულად მძიმე ბავშვები – ციციშვილის სახელობის ბავშვთა კლინიკის ხელმძღვანელის დავით რეხვიაშვილმა, “რუსთავი 2-ის” კითხვებს უპასუხა და აღნიშნა, რომ მათ კლინიკაში მოთავსებული კოვიდპაციენტებიდან, 3 ბავშვის მდგომარეობა კვლავ მძიმე რჩება.
პედიატრმა ისიც აღნიშნა, რომ კლინიკა სრულად შევსებულია და მხოლოდ ბოლო 24 საათში, 51 პაციენტი მიიღო, როდესაც საავადმყოფოს სულ 175 საწოლი აქვს.
რა გეგმა აქვს პედიატრიულ კლინიკას, არის თუ არა შესაძლებელი საწოლფონდის გაზრდა და რა ნაწილში დგას დამატებითი რესურსის გამოყოფის საჭიროება – თერაპიულ თუ რეანიმაციულ განყოფილებაში?
“გუშინ ღამის განმავლობაში გრძელდებოდა პაციენტების შემოსვლა, შესაბამისად კლინიკაში ადგილები შეივსო, თუმცა დღეს უკვე იგეგმება რამდენიმე პაციენტის გაწერა და გარკვეული ადგილი გათავისუფლდება.
საწოლფონდის გაზრდის საკითხი თვითონ სახელმწიფომ მოაგვარა და დღეიდან, როგორც ვიცი 2 კოვიდკლინიკას ემატება ინფექციის საწოლები. ამიტომ, ჩემი აზრით საწოლფონდის რაოდენობა გაიზრდება.
– ხომ არ დგას უკვე პედიატრიული საწოლფონდის კრიზისი?
– დადებითობის დღიური მაჩვენებელი გუშინ 15% იყო, დღეს კი 17%-ია, რაც ნიშნავს იმას, რომ ის შემთხვევები, რომელიც დღეს დაფიქსირდა – 11 039, მინიმუმ 3-ზე უნდა გავამრავლოთ და გამოდის, რომ შემთხვევების რაოდენობა საქართველოში სადღაც 33 000-ია. ამ პირობებში, გუშინ ჩვენ კლინიკაში მიღებული გვყავს 51 პაციენტი. კლინიკა არის 175 საწოლიანი და 51 პაციენტს რომ მივიღებთ, ნიშნავს იმას, რომ საწოლების თითქმის მესამედი 1 დღეში გვაქვს შევსებული. შესაბამისი მსჯელობით, სულ რომ დაცლილი იყოს კლინიკა, ის 3 დღეში სრულად შეივსება. იქნება ამ კუთხით გარკვეული გამოწვევები.
– რამდენი მძიმე პაციენტი ჰყავს კლინიკას და როგორია მათი მდგომარეობა ამ ეტაპზე?
– 3 მძიმე პაციენტია – ერთ-ერთს თანმხლები მძიმე პათოლოგია აქვს და მისი მდგომარეობა ისევ კრიტიკულად მძიმეა. მეორეს აქვს სამმხრივი პათოლოგია, მდგომარეობა სტაბილურია და არ გაუარესებულა. მესამე პაციენტთანაც თითქმის იგივე სიტუაციაა, თუმცა მის შემთხვევაში უფრო გაუმჯობესებაზე შეგვიძლია ვისაუბროთ. ერთი მათგანი თვემდე ასაკის არის, დანარჩენი 2 კი საშუალო და შედარებით დიდი ასაკის.
– ხომ არ მომხდარა სეკვენირება, რომელი შტამი აქვთ აღნიშნულ მძიმე პაციენტებს?
– შტამის სეკვენირება არ მომხდარა, თუმცა კლინიკური გამოვლინებით, ალბათ “ომიკრონთან” გვაქვს საქმე.
– რეკორდული ინფიცირება – დღეს 11 039 შემთხვევა გამოვლინდა… შესაძლო შედეგებსა და უახლოეს პროგნოზებზე რას იტყოდით?
– ინფიცირების მატება ალბათ კიდევ რამდენიმე დღე შენარჩუნდება, ბავშვებზე მაქვს საუბარი, რადგანაც ახლა მოხდა სკოლების გახსნა, სადაც საკმაოდ სწრაფად გავრცელდა ვირუსი. 1 კვირა გავიდა სკოლებში ინფიცირებულთა კონტაქტებიდან და ეს პერიოდი და მომდევნო კვირა, მზარდი მაჩვენებლები იქნება. თვის ბოლოს კი, ჩემი აზრით, უკვე გავალთ მაღალ მაჩვენებელზე ინფექციონისტების ვარაუდით, შემდეგ გარკვეული იმუნური ფენა შეიქმნება და დაიწყება პლატო და შემდეგ უკუსვლა,”- განუცხადა დავით რეხვიაშვილმა “რუსთავი 2-ს”.
კომენტარები