სანატორიუმ “ქართლის” მცხოვრებლებმა ცოტა ხნის წინ, საგანგებო პრესკონფერენცია გამართეს და ჯანდაცვის მინისტრის განცხადებას გამოეხმაურნენ, რომელმაც გუშინ, 16 იანვარს ადგილზე განვითარებულ მოვლენებს “უბედური შემთხვევა” უწოდა. დევნილები ამბობენ, რომ ჯანდაცვის სამინისტრო ცდილობს მომხდარის ნამდვილი მიზეზი სხვა საკითხებით გადაფაროს და ამით პასუხისმგებლობას ირიდებს.
“ჯერ კიდევ დილით, როცა პრესკონფერენციას ვგეგმავდით გვქონდა ეჭვი, ტრაგედიის ნამდვილი მიზეზის სხვადასხვა საკითხით გადაფარვის. ჯანდაცვის მინისტრმა ჩვენი ეჭვი დაადასტურა და განაცხადა, რომ ეს იყო უბედური შემთხვევა. პასუხისმგებლობას ეს უწყება ისევ არ იღებს და როგორც ჩანს, არც აპირებს.
დღეს, როცა უნდა ვგლოვობდეთ გარდაცვლილის ოჯახის წევრებთან ერთად, ვდგავართ აქ. ბატონო მინისტრო ამ ქვეყანაში ადამიანები კვდებიან ნამდვილი და სასტიკი სიკვდილით. ამ ქვეყანაში ადამიანს კლავს გულგრილობა, უიმედობა და სასოწარკვეთა, სწორედ ეს გახდა ამ ტრაგედიის მიზეზი და ამ პასუხისმგებლობას ვერ გაექცევით.
გამოითქვა ვარაუდები ფსიქიკური ჯანმრთელობის პრობლემების, ნივთიერების ავადმოხმარების, შესაძლოა სხვა ვერსიებიც შემოგვთავაზონ, ეს არის მცდელობა სასოწარკვეთაში მყოფი ადამიანის ღირსების შელახვის”,- ამბობენ დევნილები.
შეგახსენებთ, რომ გუშინ თბილისში ტრაგედია მოხდა- თბილისში ზღვის უბანში – სანატორიუმ “ქართლში” მცხოვრებმა დევნილმა თავი მოიკლა.
შინაგან საქმეთა სამინისტრომ მომხდართან დაკავშირებით გამოძიება სსკ-ის 115-ე მუხლით დაიწყო.
კომენტარები