წულუკიანმა, როგორც ჩანს იპოვა ლაშა ბაქრაძის “დახვრეტის” საბაბი და მისი მოხსნის ბრძანებასაც გააშანშალებს მალე – რომან გოცირიძე

წულუკიანმა, როგორც ჩანს იპოვა ლაშა ბაქრაძის “დახვრეტის”( განთავისუფლების) საბაბი. “მოქალაქეთა აღშფოთებაც” საბჭოთა რეჟიმიდან ისესხა არგუმენტად და მისი მოხსნის ბრძანებასაც გააშანშალებს მალე. – ასე ეხმაურება “ნაციონალური მოძრაობის” დეპუტატი რომან გოცირიძეს კულტურის, სპორტისა და ახალგაზრდობის სამინისტროს განცხადებას.

“ფაშისტური და კომუნისტური რეჟიმის სტილში გაკეთებული განცხადებაა, თუმცა ტექნიკური შეცდომით გამოწვეული ხარვეზის გამო ისინიც კი არ იზამდნენ ამას-უბრალოდ, იდეოლოგიურ სარჩულს ვერ მოუძებნიდნენ. ანა კალანდაძის ორი უცნობი, სრულიად აპოლიტიკური ლექსი სხვა ავტორის კრებულში შეცდომით რომ აღმოჩენილიყო, თუ პოლიტიკური მოტივით არ მოინდომებდნენ კრებულის შემდგენელის დახვრეტას, უსიტყვოდ გაატარებდნენ.
წულუკიანმა, როგორც ჩანს იპოვა ლაშა ბაქრაძის “დახვრეტის”( განთავისუფლების) საბაბი. “მოქალაქეთა აღშფოთებაც” საბჭოთა რეჟიმიდან ისესხა არგუმენტად და მისი მოხსნის ბრძანებასაც გააშანშალებს მალე.
სამარცხვინოა ხელისუფლებაში მყოფი და მის ირგვლივ მოტრიალე ყველა ადამიანი, რომელიც ამას და ბევრ მსგავს რამეს იტანს” – წერს რომან გოცირიძე სოციალურ ქსელში.

ცნობისთვის, დღეს საქართველოს კულტურის, სპორტისა და ახალგაზრდობის სამინისტრომ განცხადება გაავრცელა:

“2021 წლის 31 დეკემბრიდან, სამინისტროს მომართა არაერთმა სამართლიანად აღშფოთებულმა მოქალაქემ, მათ შორის, ღია წერილითაც.
ფაქტი საზოგადოებისათვის უკვე ცნობილია: გიორგი ლეონიძის სახელობის ქართული ლიტერატურის მუზეუმმა გამოსცა ელენე ბაქრაძის (დარიანი) წიგნი, სადაც ხსენებული ავტორის კუთვნილებად გამოცხადებულია ანა კალანდაძის ორი ლექსი.

ეს სამწუხარო ფაქტი, კულტურის სამინისტროს მიერ შესწავლის შედეგად, ახლა უკვე უდავოდ დადასტურებულია და, ბუნებრივია, რომ მის გამომჟღავნებას საზოგადოების მძაფრი რეაქცია მოჰყვა.
ეს არც არის გასაკვირი, რადგან საქმე გვაქვს ქართული ლიტერატურის კლასიკოსთან, სიცოცხლეშივე პოეზიის დედოფლად აღიარებულ შემოქმედთან, ვისი ორი ლექსიც სხვა ავტორს მიაკუთვნეს.

ისიც არ არის შემთხვევითი, რომ აუცილებელ რეაგირებას ლიტერატურის მუზეუმის საქმიანობაზე სახელმწიფო კონტროლის განმახორციელებელი უწყებისგან, კულტურის სამინისტროსგან მოითხოვენ.

წიგნის შემდგენელია ლიტერატურის მუზეუმის დირექტორი ლაშა ბაქრაძე, რედაქტორი – დირექტორის მოადგილე თეა თვალავაძე.
რედაქტორი გულწრფელად განიცდის აღნიშნულ შეცდომას, რასაც მისი ავად გახდომაც კი მოჰყვა.
სამინისტრო პატივს მიაგებს თეა თვალავაძის მუზეუმში მრავალწლიან კეთილსინდისიერ საქმიანობას და მას მომავალშიც მხნეობას უსურვებს.
რაც შეეხება წიგნის შემდგენელსა და, იმავდროულად, მუზეუმის ხელმძღვანელს, ის კოვიდით არის ავად. უახლოეს პერიოდში, სამინისტრო მასთანაც გეგმავს საკითხის სერიოზულად განხილვას. აუცილებელია, გაირკვეს, რამ განაპირობა ესოდენ მასშტაბური რეზონანსის გამომწვევი შეცდომა ისეთ სოლიდურ დაწესებულებაში, როგორიც ლიტერატურის მუზეუმია.

სამინისტროსთვის, ასევე, პრინციპული მნიშვნელობა აქვს იმის პრევენციას, რომ სისტემის შიგნით მსგავსი სამწუხარო ფაქტების ალბათობა მაქსიმალურად გამოირიცხოს.

საზოგადოებას აქვე ვაცნობებთ, რომ სამინისტრომ უკვე მოითხოვა მუზეუმისაგან, რომ შეწყდეს აღნიშნული გამოცემის გავრცელება და მუზეუმმა მიმართოს შესაბამის ზომებს, მესამე პირებზე გადაცემული ეგზემპლარების დასაბრუნებლად.
კულტურის სამინისტრო მადლობას უხდის ყველა იმ პირს, ვინც წიგნში არსებული შეცდომის შესახებ მას დროულად შეატყობინა”