“დაპირებები გვესმის ოთხი წელია და მათ დაპირებას ვერ ვენდობით. ინფორმაცია, რაც გავრცელდა ხელფასების მომატებასთან დაკავშირებით, იყო ჩვენთან შეთანხმების გარეშე. ასევე არაფერია ნათქვამი ჩვენს სხვა მოთხოვნებთან დაკავშირებით, აქედან გამომდინარე, ჩვენ ვაგრძელებთ პროტესტს,” – ამის შესახებ დღეს, ჯანდაცვის სამინისტროსთან სოციალური მომსახურების სააგენტოს დასაქმებულების საპროტესტო აქციაზე „სოლიდარობის ქსელის” იურისტმა დავით ომსარაშვილმა განაცხადა.
მისივე თქმით, აქციის მონაწილეები ითხოვენ ხელფასის 100%-იან მატებას, რადგან მისი თქმით, არსებული ხელფასები სოციალურ აგენტებსა და სხვადასხვა სპეციალისტებს საარსებოდ არ ჰყოფნით.
“პირველ რიგში უნდა ითქვას, რომ აქ არ არიან შეკრებილი მხოლოდ სოციალური აგენტები. აქ შეკრებილია სოციალურ სფეროში მომუშავე არაერთი თანამდებობის პირი. ეს ადამიანები ითხოვენ ხელფასების მატებას, ვინაიდან ეს ხელფასი საარსებოდაც საკმარისი არ არის. რაც შეეხება ბერკეტს, არაერთი მცდელობა გვქონდა, რომ მოლაპარაკებები წარმატებით დასრულებულიყო, თუმცა სამწუხაროდ დღეს უკვე მოგვიწია გაფიცვა, დასაქმებულების ბერკეტი სწორედ ეს გაფიცვაა. შესაბამისად ეს ადამიანები იყენებენ კანონით მინიჭებულ ამ უფლებას და იფიცებიან იქამდე, ვიდრე მათი მოთხოვნები არ დაკმაყოფილდება.
დაპირებები გვესმის დაახლოებით ოთხი წელია, რაც ეს პროცესი მიმდინარეობს, თუმცა სამწუხაროდ დაპირებები დაპირებებად რჩება. ჩვენ დაპირებას ვერ ვენდობით, ეს არის დასაქმებულების პოზიცია. ჩვენ გვინდა კონკრეტული გადაწყვეტილებები, თუმცა ის, რაც გავრცელდა სოციალური ქსელით, სააგენტოს მიერ, თავად ეს დამოკიდებულება ჩვენთვის მიუღებელია იქიდან გამომდინარე, რომ ჩვენთან შეთანხმება არ მომხდარა. ჩვენ ვამბობთ, რომ ის, რაც გავრცელდა მატებასთან დაკავშირებით, ჩვენთვის არასაკმარისია, ჩვენ ვითხოვთ ხელფასების 100%-იან მატებას. იმ განცხადებაში არაფერია ნათქვამი ამ მოთხოვნებზე, იმ სხვა მოთხოვნებზე, რომელიც ჩვენ ასევე გვქონდა, ყოველივე აქედან გამომდინარე, ჩვენ ვაგრძელებთ ამ პროტესტს,” – განაცხადა დავით ომსარაშვილმა.
ცნობისთვის, ჯანდაცვის სამინისტრომ გუშინ გაავრცელა განცხადება, რომლის თანახმად, სოციალური მომსახურების სააგენტოს მიერ შემუშავებული სტრუქტურული და ორგანიზაციული განვითარების გეგმის ფარგლებში მიღებული გადაწყვეტილების შესაბამისად, საქართველოს მასშტაბით, სოციალური აგენტების და სოციალური მომსახურების სააგენტოს თანამშრომლების ხელფასები თებერვლიდან გაიზრდება.
კომენტარები