ომიკრონით ინფიცირებულთა რაოდენობა ოფიციალურ მონაცემებზე უფრო მაღალია, რადგან ანტიგენის სწრაფი ტესტი ხშირად ცდება – გიორგი კავკასიძე

საქართველოში „ომიკრონის“ შემთხვევების მატებას მედიცინის მეცნიერებათა დოქტორი გიორგი კავკასიძე სოციალურ ქსელში ეხმიანება:

„საქართველოში ომიკრონით ინფიცირების შემთხვევები მატულობს (სხვანაირად არც შეიძლება რომ ყოფილიყო). ამ ფაქტს ადასტურებს დაავადებათა კონტროლის ეროვნული ცენტრიც.
სხვა შტამებისგან განსხვავებით ომიკრონი ძალიან სწრაფად ვრცელდება და 24-საათში ახლად ინფიცირებულების რეკორდებს ამყარებს აშშ-ში (488’000), საფრანგეთში (200’000), დიდ ბრიტანეთში (190’000). 
მკვლევარების აზრით ინფიცირებულთა რაოდენობა ოფიციალურ მონაცემებზე უფრო მაღალია, რადგან ანტიგენის სწრაფი/მარტივი ტესტი ხშირად ცდება და ცრუ-უარყოფით შედეგს აჩვენებს. ამიტომ აშშ-ს საკვებისა და წამლის სააგენტო მოუწოდებს ყველას, ვისაც ომიკრონის სიმპტომების არსებობის შემთხვევაში ანტიგენის სწრაფი ტესტით ინფექცია ვერ/არ დაუდგინდა, აუცილებლად ჩაიტარონ PCR კვლევა.
ომიკრონით ინფიცირების ადრეული სიმპტომებია:
– სურდო
– ცემინება
– თავის ტკივილი
– ყელის ტკივილი (ჩახეხილი ყელი)
– ზურგის ტკივილი…
ამ სიმპტომებს შეიძლება დაემატოს:
– შემცივნება და/ან მაღალი სიცხე
– ხველა
– სისუსტე
– კუნთების და/ან სახსრების ტკივილი
– ყნოსვის და/ან გემოვნების დაკარგვა
– პირღებინება/გულისრევის შეგრძნება
– კუჭის აშლილობა…
თავს გაუფრთხილდით, დაიცავით პირადი უსაფრთხოების წესები. გისურვებთ ჯანმრთელობას,“- წერს გიორგი კავკასიძე.