ლევან ჯავახიშვილი
„ალიას“ ესაუბრება პოლიტიკოსი, დავით ჭიჭინაძე.
– ეს ყველაფერი რაც მოხდა, ეკა ტიკარაძის გადაყენება, კახა კუჭავას გადადგომა თუ გადაყენება, მის ადგილას შალვა პაპუაშვილის დანიშვნა და მომავალი სამთავრობო ცვლილებები, რაც მეც გარდაუვლად მეჩვენება, ბიძინა ივანიშვილის გარეშე ხდება და მოხდება? ფიქრობთ, რომ ივანიშვილი არ ერევა „ქართული ოცნების“ შიგნით არსებულ დაპირისპირებაში?
– არა, ბიძინა ივანიშვილი არ ერევა. ის რომ ჩარეულიყო, ჯანდაცვის მინისტრს რომ გამოქომაგებოდა, მაშინ, ვფიქრობ, ეკა ტიკარაძე პოსტზე დარჩებოდა და მიუხედავად ირაკლი ღარიბაშვილთან რამდენიმე საკითხთან დაკავშირებით უთანხმოებისა, შეძლებდნენ თანაარსებობას. შესაძლოა, ამდენი ვერც კი გაგვეგო მათი დაპირისპირების შესახებ. ტიკარაძე ისე გაუშვა ღარიბაშვილმა, ბიძინა ივანიშვილი კი არა, არავინ გამოსარჩლებია. ეს პირდაპირ ივანიშვილის ჩაურევლობაზე მიანიშნებს. არა, რა თქმა უნდა, ივანიშვილი ტელევიზორიდან არ გაიგებდა ტიკარაძის გადაგომას. დარწმუნებული ვარ, ივანიშვილს პირადად თუ არ შეხვდა, რამენაირად მიაწვდენდა ხმას ტიკარაძე, ჩააყენებდა ღარიბაშვილთან დაპირისპირების მიზეზების საქმის კურსში, მაგრამ ვერ მიიღო მისი მხარდაჭერა, არ ჩაერია ივანიშვილი მათ კონფლიქტში. ხომ გახსოვთ, გიორგი გახარიამ რომ თქვა, ბოლოს ჩემს სატელეფონო ზარებს აღარ პასუხობდა ივანიშვილიო. შესაძლოა, აქაც იგივე მოხდა.
– კი განაცხადა ბიძინა ივანიშვილმა, როდესაც მეორედ გადადგა „ქართული ოცნების“ თავმჯდომარის პოსტიდან – მე გარედან დავაკვირდები პარტიაში მიმდინარე პროცესებს, ვნახავ, ვინ ვის აჯობებს და გუნდში ვინ დაწინაურდებაო. დავიჯერო, ეს დრო დადგა?
– კი, კი, ეგ დრო დადგა და რადგან შორიდან უყურებს პროცესებს ბიძინა ივანიშვილი, მისი გადასაწყვეტი არ იქნება, ვინ დაწინაურდება. ივანიშვილმა ყველანაირი პასუხისმგებლობა მოიცილა და ვფიქრობ, რომ ირაკლი ღარიბაშვილი, ამ ბოლო პერიოდში, მისი განცხადებებიდან გამომდინარე, მართლა დამოუკიდებელ პრემიერ–მინისტრად იქცა. ამას ხელი ოპოზიციის დასუსტებამ და დაქსაქსულობამაც შეუწყო. ოპოზიციის ამ მდგომრეობაში ჩაგდებასაც საკუთარ დამსახურებად თვლის. გუნდს აღარ ახსენებს ღარიბაშვილი, ყველაფერს საკუთარ დამსახურებად თვლის. ვიმეორებ, ღარიბაშვილი კიდევ უფრო აპირებს გაძლიერებას, საამისოდ სამთავრობო ცვლილებებს განახორციელებს და ამ ყველაფერს, ბრძოლას ძალაუფლებისთვის, ლოგიკურ დასასრულამდე მიიყვანს – ბოლოს პარლამენტსაც გააკონტროლებს.
კომენტარები