წარმატებულმა უროლოგმა ლ. მანაგაძის სახ. უროლოგიის ეროვნული ცენტრი, საოპერაციო განყოფილების ხელმძღვანელმა, ევროპის უროლოგთა ასოციაციის სრულა წევრმა, ევროპის უროლოგ ტრანსპლანტოლოგთა ასოციაციის წევრმა, საქართველოს უროლოგთა ასოციაციის წევრმა, საქართველოს ახალგაზრდა უროლოგთა ასოციაციის დამფუძნებელმა – ბატონმა შალვა მშვილდაძემ თავისი კარიერა უროლოგიის ეროვნულ ცენტრში დაიწყო და მას შემდეგ ამ კლინიკაში აგრძელებს მოღვაწეობას, სხვადასხვა დროს კვალიფიკაციის ასამაღლებლად იყო ევროპისა და აზიის არაერთ ქვეყანაში, სადაც მიღებულ ცოდნას და გამოცდილებას საქართველოში იყენებს. ძირითადად რა უროლოგიური პრობლემებით ხვდებიან მასთან პაციენტები და მკურნალობის რა თანამედროვე მეთოდები არსებობს, ამ და სხვა საინტერესო კითხვებზე, თავად შალვა ექიმმა გვიპასუხა.
შალვა მშვილდაძე: სამედიცინო ოჯახის წარმომადგენელი ვარ, ორივე მშობლის მხრიდან ექიმების გარემოცვაში გავიზარდე. მამა უროლოგი გახლდათ და მან მირჩია ჩემი უროლოგიური კარიერა დამეწყო და გამეგრძელებინა უროლოგიის ეროვნულ ცენტრში.
– რატომ მაინც და მაინც უროლოგიის ეროვნულ ცენტრში?
– თავად სხვა კლინიკაში მუშაობდა, მაგრამ იცოდა, რომ ეს ცენტრი მომცემდა წარმატებულ ექიმ-უროლოგად ჩამოყალიბების კარგ საშუალებას. ვფიქრობ ამ მხრივ, მართლაც გამიმართლა, აქ დამწყები ექიმებისთვის არაჩვეულებრივი გარემო და განვითარებაზე ორიენტირებული გუნდია, რაც მომავალი ექიმის წარმატებისთვის ძალიან მნიშვნელოვანია. საბჭოთა კავშირის ქვეყნებში რამდენიმე სამეცნიერო კვლევითი ინსტიტუტი იყო, მაგრამ აღსანიშნავია, რომ პირველად საქართევლოში შეიქმნა, მერე რუსეთსა და უკრაინაში.
– გამოცდილების უცხოეთში მიღების საშუალება თუ გქონიათ?
– ბატონი ლაურ მანაგაძის დახმარებით და მისი პირადი კონტაქტების გამოყენებით, ევროპის ქვეყნებში გავდიოდი სამეცნიერო და პრაქტიკულ გამოცდილებას, გარდა ევროპისა, ვიყავი ეგვიპტეშიც, ეგვიპტე შარდის ბუშტის სიმსივნეების ენდემური კერა გახლავთ და შარდის ბუშტის სიმსივნეებზე ყველაზე მეტი ოპერაცია იქ კეთდება.
– ყველზე ხშირად რა უროლოგიურო პრობლემებით მოდიან ქართველი პაციენტები?
– ჩვენი ძირითადი არეალი შარდკენჭოვანი დაავადებებია. მამაკაცებს ძირითადად პროსტატის პრობლემები, შარდკენჭოვანი დაავადებები და სიმსივნეები აწუხებთ.
– რა მომსახურებების მიღებაა შესაძლებელი უროლოგიის ეროვნულ ცენტრში?
– თუ რაიმე უროლოგიური მომსახურება არსებობს, პრაქტიკულად, ყველაფრის მიღება შესაძლებელია უროლოგიის ეროვნულ ცენტრში, ნებისმიერი მიმართულებით.
– რა სიახლეა თქვენს სფეროში?
– ღია წესით ოპერაციები უკანა პლანზე გადადის და მნიშვნელოვნად იზრდება ენდოსკოპიური ოპერაციების წილი, ჩვენც მივყვებით ამ ტენდენციას, ასევე ძალიან კარგად განვითარდა ლაზერული ქირურგია.
– როგორც ვიცით, თირკმლის გადანერგვის ოპერაციებიც აქტიურად კეთდება თქვენთან.
– ეს ოპერაცია თავის დროზე ბატონი ლაურის დამსახურებით დაინერგა, საქართველოში ის გახლდათ პიონერი ამ საქმეში, დღეს დიდი წარმატებით ხორციელდება ეს ოპერაციები. უშუალოდ ჩვენს კლინიკაში წელიწადში საშუალოდ, 15 ტრანსპლანტაცია კეთდება.
– ვინ არიან დონორები?
– ეს ოპერაცია მხოლოდ საქართევლოს მოქალაქეებზე ტარდება, შესაძლოა იყვნენ ვიზიტორები მაგრამ ქართული კანონმდებლობით ჩვენ არ გვაქვს უფლებას, რომ არამონათესავე დონაცია გავაკეთოთ. დონორი აუცილებლად სისხლით ნათესავი უნდა იყოს.
– რა არის თქვენი ძირითადი მიმართულება?
-,ჩემი სადისერტაციო ნაშრომი შარდის ბუშტის სიმსივნეებზე იყო, ვმუშაობ ონკოლოგიაშიც, ტრანსპლანტაციაშიც და ლაპარასკოპიულ ქირურგიაშიც.
– როგორც აღნიშნეთ, მამაკაცებში ხშირია პროსტატის კიბოს შემთხვევები, პრევენციისთვის რაიმე საშუალება თუ არსებობს?
– პრევენციისთვის რეკომენდებულია დროულად ჩაიტარონ საკონტროლო კვლევები, 50 წელს ზემოთ მამაკაცმა უნდა მოახდინოს წელიწადში ერთხელ ვიზიტი უროლოგთან, ჩაიტარონ სკრინინგ კვლევები, რათა ონკოლოგია არ მივიდეს იმ სტადიაზე, როცა მისი განკურნება შეუძლებელია.
ნინო მახარაძე
კომენტარები