“სააკაშვილს ეს დაავალა სტრასბურგის სასამართლომ და არ ემორჩილება” – კობახიძე

პარტია „ქართული ოცნების“ თავმჯდომარემ, ირაკლი კობახიძემ გადაცემაში „იმედი LIVE“ განაცხადა:

“საზოგადოებას რომ ჰკითხოთ, ვერც ერთი ადამიანი ვერ განგიმარტავთ, რატომ არის საჭირო და უკეთესი სამოქალაქო საავადმყოფოში სააკაშვილის გადაყვანა. მაშინ, როდესაც მოშიმშილე ადამიანის მკურნალობის ყველაზე მეტი გამოცდილება არსებობს სწორედ ციხის საავადმყოფოში. აპარატურა ადგილზეა, სამედიცინო პერსონალიც არის და ყველა აღიარებს, რომ ეს პერსონალი მაღალკვალიფიციურია და აპარატურაც კარგია.

ერთადერთი ინტერესი შეიძლება არსებობდეს, რომ რაღაცეების იმედი აქვთ იმ პირობებში, როდესაც სააკაშვილი ციხის გარეთ იქნება. სწორედ ეს არის დაკავშირებული უსაფრთხოების რისკებთან. სხვაგვარად, უბრალოდ აუხსნელია, რატომ შეიძლება იყოს ასე ახირებული ადამიანთა გარკვეული ჯგუფი სააკაშვილის გარეთ გაყვანაზე, სამოქალაქო საავადმყოფოში გადაყვანის მოთხოვნის სახით. აბსოლუტურად გაუგებარია. მას შეუძლია დღესვე შეწყვიტოს შიმშილობა. მას დაავალა ეს სტრასბურგის სასამართლომ, დაჟინებული მოთხოვნაა მათი. სტრასბურგის სასამართლოს მითითება აქვს გაკეთებული მოლდოვის საქმეზე, როგორც კი გასცა ეს მოწოდება სტრასბურგის სასამართლომ, შესაბამისმა პირმა იმავე დღეს შეწყვიტა შიმშილობა და გააგზავნა შესაბამისი ცნობა სტრასბურგში, აქ ვხედავთ, რომ ამ შემთხვევაშიც არ ემორჩილება სტრასბურგის სასამართლოს მიხეილ სააკაშვილი, ისევე, როგორც არ ემორჩილებოდა სხვა შემთხვევებში“