“პირდაპირ გეუბნებით ხალხო, ამ ქალაქში მომავალი კვირიდან ცხოვრება იქნება ძალიან რთული, დისკომფორტი შეექმნება ძალიან ბევრს”, – ასეთ განცხადებას აკეთებს ზურაბ ჭიაბერაშვილი “მთავარი არხის” ეთერში, გადაცემა “დღის სტუმარში” მიხეილ სააკაშვილის შიმშილობასა და სამომავლო გეგმებზე საუბრისას.
როგორც ჭიაბერაშვილი განმარტავს, მომავალი კვირიდან, სწორედ იმ ადამიანებს შეაწუხებს ქვეყანაში არსებული ვითარება, რომლებიც ახლა მიხეილ სააკაშვილის შიმშილობასა და მის ჯანმრთელობის მდგომარეობაზე “ღლიცინებენ”.
“პირდაპირ გეუბნებით ხალხო, ამ ქალაქში მომავალი კვირიდან ცხოვრება იქნება ძალიან რთული. დისკომფორტი შეექმნება ძალიან ბევრს. ვინც ახლა სააკაშვილის შიმშილობაზე ღლიცინებს, ისინი დაიწყებენ წუწუნს, რომ ვეღარ ვიტანთ, ამ უკაცრავად და შარდის სუნს. აიტანთ პირდაპირ გეუბნებით, იძულებულები იქნებით, რომ აიტანოთ და მეტსაც გეტყვით, გამოხვალთ ბუნაგებიდან, პატიებას ითხოვთ და ხელს ვერ შეუშლით ამ ქვეყნის განვითარებას, აი ეს მოხდება ამ კვირიდან, გარდატეხა გარდაუვალია. იმიტომ რომ საზოგადოება, რომელიც კარგავს მორალურ ღერძს, კარგავს ყველაფერს და შეუძლებელია, რომ ეს ასე გაგრძელდეს”, – ამბობს ჭიაბერაშვილი.
დღეს მიხეილ სააკაშვილის პატიმრობისა და შიმშილობის 38-ე დღეა. რუსთავის ციხესთან გამართულ აქციაზე გუშინ, ნიკა მელიამ ხელისუფლებას 24 საათიანი ვადა მისცა იმისთვის, რომ მესამე პრეზიდენტი სამოქალაქო კლინიკაში გადაიყვანონ, წინააღმდეგ შემთხვევაში დედაქალაქში ხვალ, 20 საათზე პარლამენტის შენობასთან აქცია დააანონსა.
კომენტარები