საქართველოს კულტურის, სპორტისა და ახალგაზრდობის სამინისტრო საზოგადოებრივი მაუწყებლის ყოფილი დირექტორის გია ჭანტურიას მიერ გავრცელებულ განცხადებას ეხმაურება, რომლის თანახმად, სახალხო არტისტებისთვის სტიპენდია 300 ლარით განისაზღვრა და ასეთი არის სულ 30 ადამიანი. უწყებაში განმარტავენ, რომ აღნიშნული სიცრუეს წარმოადგენს და გადაწყვეტილება სტიპენდიების გაცემასთან დაკავშირებით 118 არტისტს შეეხო და არა 30-ს როგორც ჭანტურიამ თქვა.

„ბუნებრივია, რომ კულტურის სფეროში ნებისმიერი დადებითი სიახლე აღიზიანებდეს ადამიანთა იმ ჯგუფებს, ვის მიერ მხარდაჭერილი ხელისუფლების დროსაც, კულტურისა და სხვა სფეროს ღვაწლმოსილ მუშაკებს „ჩარეცხილებს“ უწოდებდნენ. სინამდვილეში, საქართველოს კულტურის, სპორტისა და ახალგაზრდობის სამინისტროს მიერ ინიცირებული პროექტის საფუძველზე, საქართველოს მთავრობის 2021 წლის 2 ნოემბრის N524 დადგენილებით განხორციელდა ცვლილება და სახალხო არტისტების, სახალხო მხატვრებისა და შოთა რუსთაველის სახელობის პრემიის ლაურეატებისათვის განსაზღვრული ყოველთვიური სტიპენდია გაიზარდა 400 ლარიდან 600 ლარამდე, რაც ორჯერ მეტია, ვიდრე გია ჭანტურიას მიერ ცრუ ინფორმაციაში მითითებული 300 ლარი. ამასთან, იმ ადამიანების რაოდენობა, რომელთაც ეს ცვლილება შეეხო, არის 118 და არა 30, როგორც ამის შესახებ გია ჭანტურიამ განაცხადა. აღსანიშნავია ისიც, რომ ამ ადამიანთა უმეტესობა ღვაწლმოსილი, 70 წელს გადაცილებული პირები არიან“, – აღნიშნულია უწყების განცხადებაში.

ამასთან, სამინისტრო განმარტავს, რომ „ლიტერატურისა და ხელოვნების დამსახურებული მოღვაწეებისათვის ყოველთვიური დახმარების გაცემის შესახებ“ საქართველოს კულტურის, სპორტისა და ახალგაზრდობის მინისტრის ბრძანებით, მიმდინარე წლის პირველი ნოემბრიდან კულტურის იმ მუშაკებს, რომლებიც დღემდე დახმარების სახით სამინისტროსგან ყოველთვიურად 250 ლარს იღებდნენ, ეს თანხა 400 ლარამდე გაეზარდათ.

„ყოველივე ეს მოწმობს, რომ კულტურის სამინისტრო, საქართველოს მთავრობის მხარდაჭერით, მაქსიმუმს აკეთებს იმისთვის, რომ ღვაწლმოსილი ადამიანები მეტად დაფასდნენ. ცხადია, ეს არ არის საკმარისი, მაგრამ სახელმწიფოს რესურსიც შეზღუდულია და სწორედ ამიტომ, კულტურის სფეროში ეტაპობრივად ხორციელდება ისეთი ცვლილებები, რომლებიც კულტურის მუშაკების დაფასებასა და მათ სოციალურ უზრუნველყოფას გულისხმობს“, – ნათქვამია განცხადებაში.