“წავალ ახლა, თავს მოვიკლავ (უკაცრავად, კორექტურაა, უნდა იყოს “ხმას მივცემ”) და ისევ მოვალ” – დავით ზურაბიშვილი

ანალიტიკოსი დავით ზურაბიშვილი პრემიერის მიერ გაკეთებულ განცხადებას იმასთან დაკავშირებით, რომ სიტყვა “თვითმკვლელობის” ნაცვლად “შიმშილობა” უნდოდა ეთქვა, სოციალურ ქსელში ეხმაურება.

ზურაბიშვილი წლების წინ, გაზეთ „ლიტერატურულ საქართველოში“ მომხდარ ფაქტს იხსენებს და წერს:
„გაზეთ ლიტერატურულ საქართველოში გამოქვეყნდა თავის დროზე რაღაც პასკვილი სადაც ეწერა, რომ ისეთი ავგიას თავლა გვაქვს პოლიტსპექტრში, აქილევსიც ვერ გაწმენდსო. 
ხოლო როდესაც კრიტიკოსებმა დასცინეს, სად ავგია და სად აქილევსიო, შემდეგ ნომერში გამოქვეყნდა შესწორება: ბოდიშს გიხდით, პატარა კორექტურა გაგვეპარა, წერია აქილევსი და უნდა იყოს ჰერაკლეო,“- წერს ანალიტიკოსი და პარალელს პრემიერ ღარიბაშვილის განცხადებასთან ავლებს.
„ჰოდა, ასეა ამის შიმშილობის და თვითმკვლელობის ამბავი. 
P. S. ეჰ, წავალ ახლა, თავს მოვიკლავ (უკაცრავად, კორექტურაა, უნდა იყოს “ხმას მივცემ”) და ისევ მოვალ,“- წერს დავით ზურაბიშვილი.

ცნობისათვის, პრემიერ ღარიბაშვილის განცხადებას – „თუ ადამიანი გადაწყვეტს, რომ თავი მოიკლას, შეუძლია მოიკლას, მაგრამ ამაზე, რა თქმა უნდა, სახელმწიფო ვერ აიღებს პასუხისმგებლობას,“- საზოგადოების მხრიდან უარყოფითი გამოხმაურება მოჰყვა.
მოგვიანებით, პრემიერმა განმარტა, რომ საუბარი შიმშილობაზე იყო და არა თვითმკვლელობაზე. „ბუნებრივია, მე გუშინ ვსაუბრობდი შიმშილობაზე და შიმშილობის დეფინიცია განსაზღვრულია კანონმდებლობაში. ამაზე მქონდა მე საუბარი. შემდეგ საუბარი იყო თვითმკვლელობაზე და შეიძლება, ჩემი ნათქვამის არასწორი ინტერპრეტაცია მოხდა,“- განაცხადა ირაკლი ღარიბაშვილმა.