ჩვენი აქ მოსვლა, ასე სპონტანურად დაანონსებული აქციით, როცა ძალიან მწირი რესურსი გვაქვს იმისთვის, რომ ქართულ საზოგადოებასთან მჭიდრო კონტაქტი გვქონდეს, მიუხედავად ამისა, ერთი განცხადების შემდეგ აქ რომ ამდენი ადამიანი მოვიდა, ეს არაა ძალიან ბევრი, თუმცა ერთი დაძახების კვალობაზე არც ძალიან ცოტაა, – ამის შესახებ რუსთავის ციხესთან მიმდინარე აქციაზე ყოფილმა პოლიტპატიმარმა, ზაზა დავითაიამ განაცხადა.
მისივე თქმით, ეს ნიშნავს იმას, რომ აქციაზე ადამიანები მოიყვანა არა რომელიმე სახელმა და გვარმა, არამედ იმ ცრემლმა და სისხლმა, რომელიც ამ მტარვალმა, მიხეილ სააკაშვილმა დაღვარა.
„სააკაშვილი პოლიტპატიმრად გამოცხადებას კი არ უნდა ელოდებოდეს – უნდა შიშით ძრწოდეს. დღეს აქ ვართ 4-5 ათასი ადამიანი, მთელი საქართველო აქ მოვალთ. ილოცოს, რომ საკანი კარგად იყოს ჩაკეტილი. მიშა, მოვედით. შენგან დათრგუნული ადამიანები მოვიდნენ. მათი რისხვა, როგორც მთიდან ზვავი, ისე გორდება და წალეკავს სრულიად ფაშიზმს. ჩვენ, აქ მოსული საზოგადოება, არა მხოლოდ იმისთვის ვართ აქ, რომ წარსული გავიხსენოთ, არამედ იმისთვის, რომ საქართველოში ფაშიზმი და დიქტატურა არასოდეს აღარ განმეორდეს. სააკაშვილო, 12 ადამიანი დაგვიჭირე შეიარაღებული გადატრიალების ბრალდებით. მე ძალიან მრცხვენია, რომ ეს შეთქმულება და შეიარაღებული გადატრიალება ბუნებაში არ ყოფილა. ნეტავ ყოფილიყო, ნეტავ დაგვემხე, ნეტავ საქართველოსთვის სისხლის და ცრემლის ტბები აგვეცილებინა, მაგრამ ციხეში გამოგვამწყვდიე 12 ადამიანი, მათ შორის 3 შვილის დედა მაია თოფურია, რომელსაც წაართვი შვილების მოალერსების სიამოვნება. სააკაშვილო, შენ ახლა რა პირობებშიც იმყოფები, ეს არის ის სახელმწიფო, რომელიც შენს მერე შეიქმნა – როცა არავინ გეხება, როცა საკანში არავინ გივარდება, როცა შენი შვილების სურათებს არ ხევენ და მის შეჭმას არ გაიძულებენ, როცა გაუპატიურებას არ გიპირებენ. როცა შიმშილობას აცხადებ და განაცხადი თაფლის ქილებზე გაქვს გაკეთებული. როცა პატიმრობის მეორე დღესვე ციხის მაღაზიიდან ძვირადღირებულ ტელევიზორს ყიდულობ – მე, ჟურნალისტს, საკანში კალამი და ფურცელი რომ მქონოდა, ციხის დირექტორის სახელზე განცხადება დამაწერინეს. როდესაც აქ ცოლები გაკითხავენ, საყვარელი მეუღლისთვის ვერ გიერთგულია, შენი სახელმწიფოს პასპორტისთვის ვერ გიერთგულია, რომელ ღირსებაზე და ერთგულებაზე ლაპარაკობ?“, – განაცხადა ზაზა დავითაიამ.
რუსთავის N12 პენიტენციურ დაწესებულებასთან, სადაც სასჯელს ექსპრეზიდენტი მიხეილ სააკაშვილი იხდის, „ნაციონალური მოძრაობის“ რეჟიმის დროს დაზარალებული პირების საპროტესტო აქცია მიმდინარეობს.
კომენტარები