“ვიბრძოლებთ, რომ ზუგდიდი არ გახდეს „ნაციონალების“ ნაჯიჯგნი ქალაქი“ – წულუკიანი

კულტურისა და სპორტის მინისტრმა თეა წულუკიანმა „ქრონიკასთან“ თქვა:

„ყოველთვის ვცდილობ არა მხოლოდ პოლიტიკურ არამედ ზოგადად ცხოვრებაში, რომ რეალობებს ვცე პატივი და რეალობით განვსაზღვრო მომავალი. აქაც რა თქმა უნდა თვალს ვუსწორებ იმ რეალობას, რომ ზუგდიდელებმა საკრებულოში „ქართულ ოცნებას“ ამჯობინეს ოპოზიცია და დღეს მეორე ტურამდეც კი ჩვენ შეგვიძლია ვთქვათ, რომ ზუგდიდში საკრებულო გახლავთ ოპოზიციური ძალებით დაკომპლექტებული. შესაბამისად, „ქართული ოცნება“ არის უმცირესობაში. ეს ზუგდიდელების არჩევანია. ამ ქალაქს „ახალიების კლანმა“ გადაუარა თავზე. ზუგდიდი იყო ერთ-ერთი ყველაზე რეპრესირებული ქალაქი და ეს კარგად მახსოვს, ვინაიდან სამეგრელო-ზემო სვანეთი მხარე ჩემთვის არაა უცხო ბევრი მიზეზის გამო.

ეს ზუგდიდელების არჩევანია მიუხედავად ჩემი გაკვირვებისა და მე იმედი მაქვს, რომ მათ ეს არჩევანი გაუმართლებთ, თუნდაც მე ამის არ მჯეროდეს. რაც შეეხება მერს, ჩვენ რა თქმა უნდა ვიბრძოლებთ ბოლომდე და დარწმუნებული ვარ, რომ მერი იქნება „ქართული ოცნების“ გამარჯვებული კანდიდატი და შემდგომ ჩვენ ყველაფერს გავაკეთებთ იმისთვის, რომ ზუგდიდმა განაგრძოს განვითარება და არ გახდეს „ნაციონალების“ ნაჯიჯგნი ქალაქი, როგორც ეს იყო მრავალი წლის წინ“