“ტვ პირველმა” დაადგინა იმ ორი პირის ვინაობა, რომელიც საქართველოს მესამე პრეზიდენტის, მიხეილ სააკაშვილის, საქართველოში შემოყვანის ბრალდებით დააკავეს.
“პირველების” ინფორმაციით, ძალოვანებმა მამა-შვილი შალვა და ზურაბ წოწორიები გუშინ დააკავეს. ორივე ფოთის ტერმინალის რიგითი თანამშრომელია.
დაკავებულების ოჯახის წევრებმა ინფორმაცია, რომ მამა-შვილს საქართველოს მესამე პრეზიდენტის შემოყვანას ედავებიან, “პირველებისგან” გაიგეს.
შალვა წოწორიას ცოლი, ვერიკო წოწორია ამბობს, რომ მისი მეუღლე ფოთის პორტში 30 წელია მუშაობს, შვილი კი 11 წელი.
დაკავებულის მეუღლე აცხადებს, რომ სააკაშვილის საქართველოში შემოსვლის დროს შალვა წოწორია შვებულებაში იყო, მისი შვილი კი – სამსახურში.
ირკვევა, რომ სამართალდამცავები ფოთში, წოწორიების სახლში, გუშინ მივიდნენ, ჩაატარეს ჩხრეკა, რის შემდეგაც მამა-შვილი გამოკითხვაზე გადაიყვანეს. პოლიციამ ასევე წოწორიების კუთვნილი ავტომობილიც წაიყვანა.
წოწორიები მიხეილ სააკაშვილთან კავშირს უარყოფენ.
ვცხოვრობთ ხელფასზე, ჩვეულებრივი მუშები არიან, რა შეხება შეიძლება, გვქონოდა სააკაშვილთან?!”,- აცხადებს დაკავებულის მეუღლე.
მიხეილ სააკაშვილის საქართველოში შემოყვანის ბრალდებით ორი პირის დაკავების შესახებ დღეს საქმის პროკურორმა ისაუბრა. შოთაძის უწყებას დაკავებულთა ვინაობის შესახებ არ უსაუბრია.
ამასთან, “პირველებისთვის” ცნობილი ხდება, რა ვერსიას ამუშავებს პროკურატურა – შოთაძის უწყების ვერსიით, სააკაშვილი ოდესიდან ფოთში ბორანით შემოვიდა და ის სასაზღვრო კონტროლის გვერდის ავლით შემოუშვეს.
საქართველოს მესამე პრეზიდენტი, არჩევნების დღეს, 2 ოქტომბერს დააკავეს. პროკურატურამ იმ ბინის მეპატრონესაც წაუყენა ბრალი, სადაც მიხეილ სააკაშვილი იმყოფებოდა. ელგუჯა ცომაიამ მიხეილ სააკაშვილს თბილისში, ქვიშხეთის ქუჩაზე, საცხოვრებელი სახლი დაუთმო.
პროკურატურის ინფორმაციით, ცომაიას მსჯავრდებულ უკრაინის მოქალაქე მიხეილ სააკაშვილის მიერ საქართველოს სახელმწიფო საზღვრის უკანონოდ გადმოკვეთის ფაქტზე დანაშაულის დაფარვას ედავებიან.
კომენტარები