„მიუხედავად იმისა, რომ გახარიამ და მისმა პარტიამ ახლად შექმნილი პოლიტიკური „ორგანიზაციის“ (მათ ტერმინს დავესესხები!) პირობაზე, ურიგო შედეგი არ დადეს, სხვა სტაჟიანების ფონზე, თავად გახარია მორალურად არცთუ კომფორტულ მდგომარეობაში აღმოჩნდა,“- წერს ანალიტიკოსი ზაალ ანჯაფარიძე სოციალურ ქსელში.
ანჯაფარიძე იმ მოქალაქეებს ეთანხმება, რომლებიც ფიქრობენ, რომ გახარიას მიერ საკუთარი კანდიდატურის მერის თანამდებობაზე წამოყენება, მიზნად ნიკა მელიას მეორე ტურში „გადაჩოჩებას“ ისახავდა.
„რიგითი მოქალაქეებისთვის გამართლდა „ქართული ოცნების“ პროგნოზი იმაზე, რომ გახარიამ თბილისის მერობაზე საკუთარი კანდიდატურა იმისათვის დააყენა, რომ ნაცების კანდიდატი ნიკანორ მელია მეორე ტურში გადაეჩოჩებინა. რეალურად ასეც მოხდა, თუ ხმების პროცენტების გადანაწილებას შევხედავთ.
შესაბამისად, რთული იქნება მისთვის და მისი თანაპარტიელებისათვის რიგითი ამომრჩევლის საწინააღმდეგოში დარწმუნება, რადგანაც მათ დეტალები და წიაღსვლები არ აინტერესებთ. ისინი უყურებენ რაც ხელისგულზე დევს,“- წერს ანალიტიკოსი და აღნიშნავს, რომ გახარია საკმაოდ მძიმე მდგომარეობაშია და ადვილი არ იქნება გადაწყვეტილების მიღება იმასთან დაკავშირებით, თუ ვის დაუჭიროს მან მხარი მეორე ტურში.
„გახარიას არჩევანიც კი არ რჩება. თუ საკუთარ ამომრჩეველს კალაძის ანუ „ოცნების“ მხარდაჭერისკენ მოუწოდებს, მას ოპოზიცია გადასცემს ანათემას. მელიას მხარდაჭერა პოლიტიკური თვითმკვლელობის ტოლფასი იქნება წესით ეს არ უნდა გააკეთოს. თუმცა, დუმილიც კი ვერ იქნება ოქრო ამ შემთხვევაში, რადგანაც თუ პოლიტიკოსი ხარ, ვალდებული ხარ პოზიცია დააფიქსირო,“- წერს ზაალ ანჯაფარიძე.
ცნობისათვის, 2 ოქტომბერს საქართველოში თვითმმართველობის არჩევნები ჩატარდა.
თბილისის მერობისათვის ერთმანეთს დედაქალაქში 16 კანდიდატი უპირისპირდებოდა.
ცენტრალური საარჩევნო კომისიის მიერ გავრცელებული უკანასკნელი ინფორმაციით, ქალაქის მოქმედმა მერმა კახა კალაძემ საერთო ხმების 44,97 %, „ნაციონალური მოძრაობის“ კანდიდატმა ნიკა მელიამ – 33,98 %, ხოლო პარტია „საქართველოსათვის“ ლიდერმა გიორგი გახარიამ – 9,35 % მოიპოვა.
კომენტარები